小丹子，香港亞視出品龍虎武師，一直寂寂無名，多年跑龍套，身為二線藝人，因國家級機緣，拍攝葉師傅系列，但劇本錯將葉問過往人生經歷，以民族情緒主導，由避共嘅真相，變成抗日抗美民族英雄，反而得到內地小粉紅愛戴，搖身一變成為奧斯卡巨星，呢一切，可能係政治取態緣故，導致佢冇腰骨。
「外傷腰而及腎」
但今日我哋需要回歸醫療題目，講一講點解小丹子長期腰痛，可能係椎間盤突出問題，又或者因為長年武打劇組生涯傷患過多，導致坐骨神經痛等症狀，小丹子之前講述左腳麻痹，呢一個正正就係，腰椎間盤突出，放射性神經壓迫，引起坐骨神經痛嘅一個病例。
「腰為腎之府」
所謂好腰好腎好男人，當腰椎受傷，神經受到壓迫，氣血運行受阻，下肢機能開始減弱，必然會影響男性能力，中醫有所謂：「腰為腎之府」，同理，外在傷患引起腰部受損，必然令到腎氣減弱，繼而產生類似坐骨神經痛等症狀，下肢冇力，麻痹等症。所以我哋講，腰腎機能，互為因果，傷腰則傷腎，腎虛易傷腰，所以從中醫學理論嚟講，小丹子就失去咗腰骨啦。
「調筋骨補腎氣，有番條腰骨」
坐骨神經痛通常泛指係症狀，腰椎間盤突出就係病理學嘅一個醫學名詞，中醫針灸及手法治療，往往能有立竿見影嘅效果，但第一步首先要由調整筋骨開始，先改善結構，再進行針灸以通調氣血，如果出現腎虛症狀者，加上藥物調補肝腎，條腰骨就可以歸位，腎氣更加可以回復，就能夠做返一個頂天立地嘅真漢子，不為五斗米而折腰。
「大夫常用穴位」
專業針灸師治療，必以經絡為首，穴位輔之，辨其陰陽，針灸效果，非常顯著，常用董氏奇穴靈骨、大白二穴，肺經虛而致生化乏源，金不生水，腎氣虧虛。亦可以各不同派系針灸之法，例如：環跳穴、風市穴、腎俞穴、腰陽關穴、關元穴、委中穴等，腎虛腰患，必迎刃而解，但推其首要，醫者自身練功，強盛腎氣，以氣導之，必然事半功倍，病者更容易康復。
「冇腰骨者，腎虧是也」
所以老生常談，搵一個有腰骨嘅醫師治療腰骨嘅問題，必然效果顯著。相反，比喻嚟講，如果醫師本身冇頭髮，又如何能取信於病人治療脫髮之妙法？
本身係一個太監，又如何能夠令人相信，佢床上功夫之精湛？所以治病求本，腰為腎之府，強腰即強腎，弱腰即弱腎，而「冇腰骨者，腎虧是也」。
正視腎虛問題，大家一定要強腰補腎，方可預防及治癒腎虧之腰患呀！
烈大夫
香港註冊中醫師
英國曼徹斯特註冊針灸師
青木堂中醫總舵主
現遊歷天下五湖四海，笑傲江湖，開立診所及進行全球義診，以弘揚傳統針灸醫學為己任，無忘學術及言論自由的價值，為發揚傳統醫學略盡棉力。
