9月26號統計處有更加多嘅數字釋出，最主要都係將之前19號嘅就業數據再加以詮釋，用更多嘅數字去支持。當中有幾個數字值得我哋去留意，包括係工作超過一份嘅人數穩步上揚，開工不足率增加，青年失業率亦有輕微上升。
全國工時上升780萬小時，按月遞增0.4%，其中男性增加0.9%，女性增加2.3%，顯示女性重新投入職場工作嘅趨勢持續增加，男女性職場比例逐漸縮減，女性工作比率按年上升3%，比起男性2.3%高出0.7%。升幅受惠於兩個因素，第一是去年立法的work gender equality act（WGEA），第二是女性一般來說工資仍然未能追上男性，雖然有WGEA，有啲僱主為節省成本，以及遵從法例，雖然明知需要盡量調整薪酬，卻仍傾向以較低人工聘請女性。
另一個值得注意嘅數據就係擁有多於一份工作嘅比率穩步上揚，男女平均數由2019年嘅大約不足7%，上升至現時約9%，當中擁有兩份工作嘅女性比例更高達10%，比男性約8%高兩個百分點。數據反映以現時澳洲，尤其是傳統大城市例如雪梨及墨爾本，生活成本不斷上升，薪金及未能追上通脹，令到有更多人需要多一份工作去維持生活。呢個情況會喺零售及餐飲業比較普遍，一來呢兩種工種會傾向多請臨時工，而臨時工一般都係能夠工作超過38小時，另外有啲臨時工係以現金支薪（呢個應該係冇包含喺統計數據），因此實際數字應該比釋出嘅統計數據為高。之前有非正式調查顯示，有臨時工每周工時高達80小時，即係每日返工超過10小時，雖然明顯違反公平工作條例，但由於僱傭雙方都冇意見，政府亦都冇辦法能夠全面抽查，喺隻眼開隻眼閉嘅情況之下，呢個情況將會持續落去亦都有繼續攀升嘅趨勢。
青年就業不足率微升0.1%，繼續處於雙位數字（ 10% ）嘅水平，遠超於整體失業率。預期情況將會持續甚至惡化，因為新增職位持續下跌，僱主正如係唔同嘅文章都已經提到，傾向聘請有經驗人士，變相減低青年能夠成功入職嘅比率。因此，年青人應該考慮唔好太揀擇工作，先投入職場爭取經驗，以增加以後能夠入職自己心儀工作嘅機會。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
