開學僅一星期，過去3日香港至少有7宗涉及學生自殺、自殘或嚴重情緒危機嘅個案，其中3名學生死亡。
今日見到教育局局長蔡若蓮上電台時話：
「這個時代急速轉變，同學的學習需要也越來越多元化，他們面對的成長環境亦越來越複雜，對我們的專業挑戰很大。其實剛剛開學一星期，相信同學都在適應過程中，可能假期時差還未調整，又睡得不好，所以我也鼓勵同學要留意自己情況，家長亦要更多留意同學情緒…… 如果留意到一些情緒反應，要自己早點、又敏感點，可以找一個幫到自己的朋友、老師或家長講。」
(照佢原話抄返出嚟，費事又話斷章取義……)
咁無sense又涼薄嘅說話，唔講都差唔唔記得蔡局長自己曾經經歷過喪子之痛，長子墜樓身亡。
當年我睇到新聞，第一個反應當然係覺得外人唔知頭唔知路，無謂喺人哋最痛苦嘅時刻講風涼說話。無論一個人政治立場係乜，咁樣失去至親都係難以想像嘅痛，所以氣一直唔認為呢件事應被用嚟羞辱或者攻擊佢。
正因此，聽到局長呢番說話先感格外諷刺。照局長嘅邏輯套用喺身上，難道就可以話，當年佢個仔承受咁大痛苦，係因為佢無做好家長嘅角色、無及時察覺到嗎？如果連一個有教育背景、有資源、有能力關心子女嘅家庭，都未必可以及時察覺或者阻止悲劇發生，咁點解去到其他家庭身上，政府第一時間又將焦點放返落「家長要留意多啲」、「學生要敏感啲、早啲求助」？
家庭當然係支援嘅重要一環，但制度有更大嘅責任。作為教育局局長嘅蔡若蓮，唔通真係唔明呢個道理？
甚至先唔好講一個教育局局長嗰一刻可以提出咁咩政策反思，純粹一個人應有嘅同理心，對幾日內接連發生嘅悲劇表達一個有溫度嘅關心，都聽唔到。
情緒危機唔係開學突然爆出嚟，開學亦未必係壓力嘅起點。佢可以係一個trigger，令本身累積咗幾個月甚至幾年嘅壓力浮上水面。香港學生嘅學業壓力有幾大，大家都知。叫學生「留意多啲自己嘅情緒」、搵人求助之前，不如先問：乜嘢令佢哋需要求助？叫家長「留意多啲」之前，亦不如先問：家長可以做乜？
香港學齡人口急跌，學校面對收生、縮班甚至停辦壓力，通通都要追數交代，最後個壓力就層壓式咁放晒落啲學生到。局長叫家長留意，敢問當仔女每日面對排山倒海嘅功課測驗，家長又係咪可以同學校講：「我個仔壓力太大，今個星期啲功課唔做、個測驗唔考」？友朋之間必然會有比較，其他同學繼續考、繼續補習，家長可以點樣獨善其身去保護小朋友？
再睇學校本身：老師本身已經要兼顧教學、行政、學生情緒、家長、活動同各種政策要求，呢幾年先要求每科每班老師要寫報告，講點樣將國安元素融合到課程中，跟住又要求老師要上國安課程進修，究竟有幾多時間觀察每一個小朋友？教育局現行嘅「三層應急機制」，依賴學校前線識別到高學齡生，但學校教師、社工及輔導都面對沉重嘅工作壓力，嚴重缺乏人手。
如果學生唔講呢？如果老師忙到根本無時間發覺呢？如果一個十幾歲小朋友自己都唔知道，原來已經去到危險邊緣呢？
發生呢啲事，政府永遠淨係講搞咗咩講座、工作坊，教學 生「抗逆」、「鼓勵佢哋求助」。倒不如正視問題：係咪可以減少不必要嘅測驗同評核？對學校嘅評核，可唔可以唔好淨係睇成績？可唔可以增加社工、心理學家同輔導人手，尤其喺開學、考試等高危時段額外加派專業支援？係咪應該每次呢啲事件後，都有一個真正獨立、公開嘅檢討，而唔係又一輪「正向思維」、「抗逆力」？
近年人才計劃衍生嘅「考試移民」同「借殼辦學」爭議，有關漏洞到而家仍然存在，人才子弟同本地生爭大學學額嘅問題，持續影響緊香港嘅學生。仲要有議員出嚟講話，而家考生少咗咁多，多返啲良性競爭係好事（……）
再延伸落去整個社會氛圍：喺國安治港之下，政治審訊從未停歇，公共討論空間愈來愈窄；宏福苑人禍慘劇後，刑事程序、善後同獨立委員會調查至今仍然未完成。大人本身都面對經濟、家庭以至公共生活嘅焦慮同無力感，更唔好講小朋友會點樣隨之受到影響。唔好再講政治係政治、教育係教育、精神健康又係另一樣嘢。呢啲所有嘢都係環環相扣。
我之所以對呢件事咁火滾，亦係因為我自己當年就係頂唔順香港嗰種學業壓力，先萌生去外國讀書嘅念頭。慶幸屋企有咁嘅能力成全我，程度上係「逃過一劫」。但唔係人人都有咁嘅機會。
後來，身邊有朋友因情緒問題離世，更有師妹喺返學期間喺操場跳樓。可唔可以想像到，嗰份震驚對當時仲讀緊書嘅學生同老師，留下幾深嘅傷痕？
香港學童精神健康根本唔係第一日有問題。2021至2025五年間，中小學生懷疑自殺身亡個案累計已經有141宗；單計2023至2025三年就有91宗，約九成係中學生。
到底係政府對問題理解不足，定係根本唔願意面對？
教育局理應係同學生、家長、學校站喺同一陣線、同一條team，以學童健康成長為最大前提。
但局長呢一番話，係將教育制度嘅結構性問題包裝成「時代轉變」、「成長環境複雜」，再將注意力卸晒落學生、家長同老師身上。
學生要學識求助。 家長要關心子女。 老師要留意學生。
但教育局亦應問返自己一句： 你哋究竟做咗啲乜， 去令小朋友少一些需要「被救」？
呢五年間嘅141宗懷疑自殺身亡嘅個案，每一個都係本來應該可以繼續長大嘅人。
而掌握制度權力嘅人，如果面對一條條已經失去咗嘅生命，最後仍然只識叫小朋友「堅強啲」、「正面啲」、「有事搵人講」，其實真係好難聽。
要做一個令人信服嘅官，幾好打都好，冇 compassion，最後都只係徒然。
請繼續關注和支持 The Committee For Freedom in Hong Kong Foundation 的工作。
