踏入2024年，又係時候睇返2023年嘅就業數據。一般嚟講就業數據會滯後大約兩個月，即係話我哋而家睇到嘅係2023年11月時候統計處釋出嘅數據。
失業率就如我所料，攀升到3.9%，接近4%。10月嘅時候我嘅分析係受惠於聖誕節零售餐飲同埋旅遊業嘅勞動市場，以致10月嘅數據維持喺3.7嘅失業率，估唔到最後都捱唔過個假期，升咗0.2%。過去嘅聖誕節零售業雖然未如理想，但係飲食業同旅遊業亦都有唔錯嘅表現，咁個0.2%嘅失業率喺邊度嚟㗎呢？最後梗係只指向白領同藍領階層啦。尤其是藍領，聖誕節嘅時候一般都係長假期，好多工廠都會放假，亦都會趁呢個機會調整人手，有機會就係喺呢個位減少勞動力。
就業參與率微升至67.2%，新增全職職位57,000個，全職勞動人口為9,900,000左右。兼職職位新增4700個，勞動人口為4,350,000左右，所以澳洲勞動人口大約一千四百萬左右，是全澳人口的53 ％。就業不足率亦升至6.5%，意味就業人口的生產能力未被充分利用的情況加劇，技術不匹配的情況亦趨嚴重。值得留意的是年青人（15-24歲）失業率上升至9.3%，超過現時整體失業率一倍以上，顯示於該sector就業情況未如理想。調查發現他們高失業率的原因是由於他們有更高被解僱的風險：在職年期短、技能水平未達標準、對公司欠缺歸屬感等⋯⋯ 另外，他們自願離職的比率亦比其他年齡層為高。
由於好多澳洲人都仍然處於放假心態當中，需要等到國慶日之後，職場先至會全面復常，雖然已經過咗兩大節期，企業都仍然大多採取官網態度，現時坊間嘅職位空缺相信不會有太多嘅增加，去到二月左右新增職位相信會攀升。
分析也一般相信，加息周期有機會於2024年完結，儘管如此，失業率上升仍然有呢個風險。去到年中我仍然預期係會上升到4%或以上。隨着政府大幅更改移民政策，相信由2024年下半年開始申請嚟澳洲嘅移民將會有更高嘅學歷以及工作資歷，為勞工市場注入新血。我傾向相信中低層員工工資會下調，行政人員嘅工資卻維持增幅，與中低層員工距離有更大差距。
亦都正如我之前講過，求職者應該更加着眼喺自己擁有嘅專業技術，履歷上將自己過往於公司成功處理嘅project簡潔列出，以及自己嘅技能亦都需要清楚列出，令僱主能夠以最短嘅時間就能夠睇得到你嘅技能，從而作出決定。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
