之前同大家討論過工傷要點樣做，都係比較喺僱主層面去討論。其實如果再深入啲去睇，僱員應該喺受傷之後要做啲乜嘢先至可以能夠順利咁攞到公司所購買嘅勞工保險呢？工傷大致上係有分兩種，一種就當然係身體受到傷害啦；第二種就係我哋話係屬於Mental，如果係心理上嘅傷害係更加難去處理嘅。先同大家集中去講 physicalIy受傷嘅時候，有啲乜嘢需要注意。
首先第一件事就當然係你受傷之後要立即通報上司知道，若然係需要入院又或者甚至需要報警嘅話，咁就當然大家都唔想。見醫生嘅時候佢會幫你去填寫一張叫做COC（certificate of capacity），呢張嘢會證明你受傷，同埋你能夠處理到嘅工作。舉個例子吧，若然你係一個喺店舖裏面嘅sales，你跌親整親隻手，打咗石膏。咁嘅話COC就會寫明你係唔可以拎重嘢啦（好似有啲廢話，但係好實在），並且有一個時間性，即係話可能你未來四個禮拜都唔可以拎重嘢。
COC係重要嘅文件，因為保險公司係需要就住呢份文件去斷定你嘅賠償。例如COC話你只係得50%嘅工作能力，咁即係話公司需要負責你50%嘅工資，另外嗰一半就會由保險公司支付。因此，保險公司會追得好緊，因為如果你一日好唔返嘅話，其實係代表保險公司需要一直支付你部份甚至的全部嘅工資。而呢一樣嘢亦都帶到去保險公司係會同你去定訂一個所謂嘅 Back To Work Plan，即係需要去制定，並肯定你係能夠返到你受傷前嘅崗位去執行你日常嘅職務，同時間又唔會影響你嘅康復進度。到最後當你康復之後，保險公司就梗係Close File，你都會回到你正常嘅工作崗位。
若然係受到心理傷害又點樣呢？呢個就好複雜喇。因為如果個員工係去睇醫生話受到心理傷害嘅話，而佢亦都決定要去報保險，公司就有責任於三個工作天內回覆，注意係回覆，並不代表公司需要同意呢一個嘅索償。回覆過後，當進入索償程序，保險公司有機會會派員去到公司，並展開調查，包括會訪問唔同嘅員工，就好似做偵探咁，嘗試將成件事拼湊起嚟睇吓成唔成立。
若然事件成立嘅話，咁當然要處理啦，就有機會係出現剛才講嘅COC，究竟「受害者」有幾多嘅工作能力，就好睇醫生點寫。若然經過調查之後發覺唔成立嘅話，咁呢份保險或者索償則不受理，而員工就需要以病假又或者年假去抵消番佢攞嘅工傷假期。
因此喺工作期間受傷，並唔係淨係計返啱數賠償咁簡單，後面所涉及嘅程序，其實十分複雜。所以大家返工放工都係錫住自己，唔好整親。
作者：Sydney HR 的日與夜
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
