演藝事業陷入低潮，王宗堯並沒有讓自己停下來，更與一班志同道合的人成立品牌「手足不散」，在商品生產上，以及賣貨所賺金錢繼續幫助香港人和同路人。
問到當初為何有此念頭？Gregory說：「其實品牌個名，當初都諗咗好耐。我哋本身有一班人，當初見到好多人喺一個集會上面，突然之間大家好慌亂地逃難，跟住我哋幾個就留守幫手做支援，我哋就話呢樣嘢係好緊要，跟住就整咗個group，來源就係咁嘅，group入面嘅人就係『手足不散』嘅始創核心人物。當初疫情開始嘅時候，我哋都有幫手去搵口罩，我覺得呢樣嘢，係我哋呢個年紀或者呢一個社會年齡層，可以做到最有幫助嘅嘢。」
而成立品牌的理念一直希望幫助同路人，因此Gregory認為搵香港人做好重要。「希望幫到一啲同路人，例如派送，香港黃嘅、同路人嘅速遞基本上冇晒咁滯，依家就用呢啲派送公司之前嘅司機幫我哋做派送。」
至於設計方面，Gregory亦找到同路人「vawongsir」中學視藝科老師黃sir與其品牌crossover。「vawongsir」於反修例期間因在網上發布政治漫畫而遭投訴，在原先任教的學校不獲續約，其後獲另一學校聘請，惟教育局裁定他專業失德，但他於當局作出裁決前已辭職。原來 Gregory 跟「vawongsir」亦有段淵源：「其實佢係我師弟，都係英華仔，好有緣，我哋搵佢合作就係因為見到佢有件咁嘅事發生。」
「vawongsir」為「手足不散」設計的兩款生命線系列tee亦頗有意思，其中一款圖案是花，Gregory解構當中意思：「用個design去延續某啲嘢嘅生命，朵花係一條線畫出嚟，白色嘅，喺黑色tee上面希望有一朵白色嘅花，點樣都好，有一朵花俾你carry住，有陣時你好唔方便㗎嘛。」至於另一款是蘋果圖案，當初構思將賣tee的錢在《蘋果》落廣告，因當時壹傳媒在營運資金方面出現問題。
雖然成立品牌當老闆，但Gregory原來並不喜歡做生意，將之當成一門藝術創作，才能讓品牌走得更遠。「創作，可以將理念擺落去嘅，而唔係淨係商品嘅時候，我覺得呢樣嘢可以繼續做。」
棱角編輯部
