人望高處，打工仔好多當然希望有出頭嘅一日。啱啱返工入職作為一個小員工，勤勞嘅小蜜蜂們辛勤工作，希望有一日能夠升職加薪，做個主管仔。當有一日夢想成真，真係成為一個主管之後，你有冇發現，其實從來係冇人教過你點做manager，除咗日常事務之外，仲有一大堆包括要交嘅report，人與人之間嘅關係等等，根本從來都冇學過。你可能話，冇嘢呀，好易啫，呢啲都要教？講就梗係天下無敵，實際做落嚟，你就知道唔係咁簡單。
身邊有朋友剛剛升職，因為佢個主管離職，自己突然之間就擔起重任，成為部門主管。因為唔係空降，身邊嘅同事忽然個個搖身一變成為自己嘅下屬，喺管理方面已經立即出咗第一個難題，以前個個唯唯諾諾聽老細話，跟指示做嘢，家陣自己成為了俾指示嗰個，心中忐忑驚俾錯指示，一陣做錯嘢交錯貨咪大鑊！這是第一重的壓力。
你可能覺得冇乜嘢啫，大家都係咁做嘢嘅咋嘛。你問吓自己啦，成班同事圍威喂嘅時候有冇數過自己老細先？家陣你坐咗佢個位你就知道你以前班friend可能都係咁樣數緊你。面對deadline，成Team人要交貨嘅時候，你Push定唔Push ？呢個慘過百萬富翁最後一百萬嗰條問題，一陣間你壓得太過分，佢又話你家陣升咗職唔識人，你唔叫佢，最後可能自己做晒更加冇癮。這是第二重壓力。
老細升得你，一係佢就唔想俾錢請過個有經驗嘅，見你做開嘅搵你頂住先，萬一真係搞唔掂先再算；一係佢就覺得你搞得掂，叫你頂硬上幫手為公司繼續仆心仆命。前者同後者都會為你帶來壓力，有前車可鑑，一係佢就衰到貼地而家新人士新作風就想有所改進；到返轉之前嗰個好到冇朋友，你又要維持整個團隊有返同樣嘅工作氣氛，又係一大難題。呢個就構成第三重壓力。
呢啲嘢都唔係你初入職嘅時候會教，又或者喺大學嘅時候學過嘅。咁點搞呢？冇嘢嘅，好多時候就係邊學邊做，一係你之前就有一個非常好嘅師傅，可以俾你開「睇住做人」。我一生人經歷過三個好老細，佢哋都係好嘅學習對象，包括點樣管理同事同埋同同事溝通，甚至日常公司運作等等，佢哋都比到我非常正面同正向嘅教導同榜樣。佢哋教我曉咗我乜嘢？下次再同大家分享。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
