澳洲嘅「副業經濟」可能已經去到一個轉捩點。
澳洲統計局（ABS）最新公布嘅2026年6月季度數據顯示，澳洲有1,049,100人同時持有多於一份工作，佔所有受僱人口6.9%，創自1994年開始有紀錄以來嘅新高。簡單啲講，即係而家大約每十四個受僱人士，就有一個人同時做多過一份工。更加值得留意嘅係，多重就業人士數目按季增加6.6%，按年更增加11%，即係一年之內多咗103,700人。
呢個數字其實唔只係「有多咗人做part-time」。ABS數據顯示，2026年6月季度主要工作有15.16百萬份，但secondary jobs已經增加到1.164百萬份，按季增加4.6%，按年增加11.7%；secondary jobs佔所有filled jobs嘅比例亦升至7.1%。而最多secondary jobs集中喺醫療及社會援助、行政及支援服務，以及教育及培訓。
呢個反映嘅，其實係澳洲勞動市場一個幾深層嘅轉變。
以前我哋講「一份工」，通常係一個人有一份主要工作，靠呢份工作支付生活費，僱主亦假定員工嘅主要時間、精神同工作能力都投入喺呢份工作上。但而家呢個模式開始動搖。越來越多人唔再將「一份全職工作」視為唯一收入來源，而係將收入拆開成兩份、三份，甚至一份工作加一門自己經營嘅小生意。
呢個現象未必全部係因為大家突然變得好有創業精神。
Westpac喺2025年11月公布嘅研究顯示，55%澳洲人表示自己已經透過side hustle賺取收入，或者正積極考慮開始一項副業；其中27%已經有副業或者小生意，另外28%考慮喺未來12個月開始。更加直接嘅係，77% side hustlers表示，增加收入係佢哋開始或者考慮開始副業嘅主要原因。
所以，呢個未必係「澳洲人突然好鍾意做多份工」，而係經濟環境令人開始重新計算自己嘅收入風險。
一份人工，以前可能已經足夠；但當生活成本、房租、按揭、家庭開支及其他固定支出上升，一份收入嘅風險就開始變得明顯。與其完全依賴一個僱主，部分人會選擇多一份收入來源。對僱員嚟講，呢個係增加收入；但從更宏觀角度睇，亦可以理解成澳洲家庭開始將「收入風險」由一個僱主承擔，慢慢轉移返落自己身上。
一方面，澳洲勞動市場仍然有相當強嘅就業保障同員工福利；另一方面，越來越多人選擇唔只依靠一份工作。ABS早前數據亦顯示，1994年至2019年，多重就業率大部分時間只係維持喺5%至6%之間；COVID-19期間曾經大幅下降，但由2022年開始重新上升，而且長期維持喺6.4%至6.7%之間，去到2026年6月更突然升至6.9%。
所以呢個唔似係一個短期現象。
另一個值得HR留意嘅變化係，僱主自己其實都開始適應一個更加流動嘅勞動市場。Deputy針對frontline workforce嘅2026年研究，根據超過4,100萬個shift數據分析，持有多於一份工作已是澳洲frontline work嘅重要趨勢之一，亦已經去到十年高位。
Deputy嘅數據亦顯示，2026年上半年僱主開始將更表提早鎖定。6月份平均提前8.3日安排shift，而1月至4月平均約5.8日。呢個趨勢係鑑於當員工唔再只有一份工，僱主需要更早鎖定更表，安排人手。
但係，副業愈普遍，HR面對嘅問題亦會愈多。
第一個問題係利益衝突。如果員工放工之後做另一份完全無關嘅工作，通常唔會係大問題。但如果佢第二份工作係直接服務公司同一批客戶、使用相同供應商、做競爭對手嘅生意，甚至將公司嘅客戶資料、pricing、supplier information、software、equipment或者工作時間攞去做自己嘅生意，事情就完全唔同。
澳洲公平工作委員會對out-of-hours conduct嘅原則亦講得幾清楚：僱主唔可以單純因為員工放工後做咗某件事就干預私人生活；外間行為必須同僱傭關係有實質關連，例如對僱主利益造成損害、嚴重破壞僱傭關係，或者同員工本身對僱主嘅責任不相容。
即係話，唔俾員工秘撈就唔係講句嘢咁簡單。僱主真正需要處理嘅，係conflict of interest、confidentiality、performance、fatigue、safety同competition。事實上，Fair Work Commission近年嘅案例已經顯示，如果僱傭合約本身要求員工就secondary employment取得批准，而員工隱瞞自己經營競爭性業務，再加上使用公司機密資料，呢啲就可能由「私人時間」變成嚴重嘅僱傭問題，甚至成為解僱嘅有效理由。
反過來，員工亦唔可以以「副業係我私人時間」做萬能擋箭牌。如果你朝九晚五返一份工，夜晚再做另一份工，星期六日又繼續做，最後返第一份工時已經精神不濟、經常遲到、工作表現下降，甚至因為疲勞增加安全風險，僱主當然有理由關注。
尤其係醫療、運輸、製造、建築、care services呢類對安全高度敏感嘅工作，fatigue唔係純粹「私人選擇」。WHS本身就要求企業識別、評估及控制工作健康安全風險。所以真正問題唔係「員工可唔可以有第二份工」，而係第二份工有冇開始影響第一份工。
員工自己當然亦有風險：副業由興趣變成收入來源，就可能由hobby變成business，涉及ABN、稅務及其他責任。澳洲政府2026年公布嘅side hustle指引亦提醒，副業可以係hobby或者business；如果開始以盈利為目的、擴大客戶群或者持續銷售，就可能已經唔再只係私人興趣。
仲有一個更加現代化嘅問題：工作時間同私人時間嘅界線。
澳洲已經有Right to Disconnect。根據Fair Work Act，員工喺非工作時間可以拒絕監察、閱讀或者回應僱主聯絡，除非拒絕係不合理；判斷是否合理，要考慮聯絡原因、干擾程度、員工是否獲得補償、職位責任，以及個人及家庭情況。
但如果一個人自己主動將私人時間變成第二份工作，情況就更加複雜。
朝早返第一份工，放工後返第二份工，夜晚再處理自己嘅online business，星期六日繼續做。最後可能出現一個好諷刺嘅結果：法律愈來愈強調work-life balance，但經濟壓力就令部分人自己主動將life變成另一份work。
所以ABS今次嘅1,049,100人唔應該只係當成一個「副業流行」嘅新聞數字。而係一個更深層嘅經濟轉變：澳洲人開始由「一個人、一份工、一份收入」嘅傳統僱傭模式，逐步走向「一個人、多個收入來源、多個僱傭關係」嘅新模式。HR真正要做嘅，唔係一刀切禁止side hustle，更加唔係假設員工放工之後仍然只屬於公司。
真正需要建立嘅，係一套清楚嘅遊戲規則：乜嘢可以、乜嘢需要申報、乜嘢涉及競爭、乜嘢涉及機密資料、乜嘢情況會影響工作表現或者安全，以及當利益衝突出現時，公司可以點處理。因為當「第二份工」已經由例外變成一百萬人嘅日常，企業仲用十年前「員工得一份工」嘅思維去管理今日嘅勞動市場，最後只會攪到自己。
作者：Sydney HR 的日與夜
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
