近排幾位朋友都DM細粒姑問買唔買車好，揸車係點樣，噉我又隨筆噏吓我對揸車嘅睇法。言則，身邊亦好似唔少人有呢個移民思想陷阱。
首先呢講吓我情況：我係有車牌嘅。喺澳洲要找個廣東話師傅教都唔難，啲路易揸過香港好多，車又少啲，路闊啲，一take pass very easy。
但點解我冇買車呢？主要係因為我用唔著。
我買屋時位置都近好幾種公共交通，一程車就返到工。買餸又行五分鐘就有超市菜檔，屋企又冇老人家小朋友需要接載。喺細粒姑嘅日常生活中，又唔係好必要養一㗎車。
以細粒姑住嘅州分計，一年牌費、燕梳（insurance)、年檢，冇兩千澳紙埋唔到單，再加上公路路費，油錢，泊車，數目唔細。（澳洲地大，㗎車跪低之類好麻煩，石仔、野生動物、路面垃圾又多，我覺得買全保會穩陣啲，唔好慳；當然，都睇你個人取捨）細粒姑出沒地點又多數係city 呢啲難泊車嘅地方，一星期五日都用唔到嘅車，買返嚟擺咩😂 真係要去遠/車唔到嘅地方又有拍卡租車，apps book車嘟卡就可以上車開車，真係好夠用。
無可否認，擁有一㗎車，出入方便，嗰一種自由自在想去邊就去邊嘅感覺真係爽。買嘢又唔使自己抬，因著你住嘅位置揸車出入仲好可能係必須。
但聽唔少朋友一落地就急住買車，工都未找到，就要買車買樓，settle in 云云。唔係唔贊同買樓買車，但呢個就好似香港人嘅小小夢想，移民就要住大獨立屋揸車出入田野間… 背後原因有好多，香港嘅居住生長環境毋需多講，講起又係傷心…
但係到埗嘅初期，萬事都可以一步步慢慢嚟，買樓唔好急，租住唔同區試吓啱唔啱自己先；返工返熟咗先知份工啱唔啱自己，唔好打死一份要攞多啲唔同經驗，轉工又可以搬過嗰邊試吓；車嘅嘢，有用、維到皮就買，唔係tick box，唔係揸車先係成功人士。買多咗嘢又要負擔，有咩變故又脫唔到手，變成你settle in路上嘅累贅，又有何謂呢。
—
2024嘅細粒姑挑戰新corner！
細粒姑娘嘅隨筆噏
精神唔再係講病，而係點樣達至精神健康
每一期，兩個字做標題
可以係某一個階段
可以係某一個徵狀
希望可以及時補充你嘅能量
繼續喺異地撐住你嘅香港人生
#細粒姑講吓經 #移民精神健康 #揸車
