唔知大家有冇發現，點解你知、我知、單眼佬同陳師奶都知，中國經濟咁差，但 GDP 就年年有增長？傳統經濟學裡面 GDP 增長就係經濟增長，咁中國係啱啱過去嘅 2023 年 GDP 增長係 5.2 %，即係佢哋係個個月都有大型房地產發展商債務違約，息都還唔起，消費唔得，外來投資又無嘅情況下，經濟增長都有 5.2 % 喎。講到就嚟支爆咁款，係咪我哋呢班經濟 L 吹大咗？
又或者聰明嘅讀者已經即刻會諗到，呢啲極權國家基本上十居其九都會有「篤數」嘅問題。當然我哋係無辦法證實到中共有冇「篤數」或者篤幾大，但假如退一萬步，我哋假設中共竟然神奇地食咗誠實豆沙包無篤數嘅話，佢哋嘅所謂「經濟增長」又有冇可能存在？
係解答呢個問題之前，首先要簡單講下 GDP 係點樣計出嚟嘅。
(Gross Domestic Product, GDP)，中文係國內產總值，係用嚟計算一個國家係指定定期間內所有生產，勞動及最終商品的市場價值。
一般嚟講，我哋就會用呢條公式去計個 GDP 嘅，
GDP = Consumption（消費） + Investment （投資） + Government Spending （政府開支）+ Net Exports (Exports minus Imports) （淨出口）
而當中所有做完而「未」賣到嘅貨，不論佢係樓、係電動車、還是鋼筋水泥，所有倉存都係計落去 Investment （投資）嗰度。
聰明嘅讀者你冇理解錯，只要中國不停起樓、修橋、補路或者整啲電動車出嚟，不論佢哋係塞晒喺人哋個港口度嘅電動車、或者係無人住嘅鬼城、全部無人買無人用，佢哋都會計算落去佢哋嘅 GDP 嗰度。
你可能會諗，咁 GDP 呢個數字咪好戇居？整啲無人用嘅嘢，都係經濟增長？其實就唔係 GDP 戇居，係無諗過有國家會攞佢嚟做數。
我估呢個亦都係點解中國官方咁鍾意強調 GDP 增長，經常用佢嚟做指標去量度自己嘅經濟表現，年年都係嗌保八保七保六。不過無論你吹幾大都好啦，呢個世界都有其他辦法去評估實際嘅中國經濟到底係咩情況嘅。
例如英國政經雜誌《經濟學人》喺 2010年就提出用「克強指數」，「克強指數」源於李克強在2007年任職中共遼寧省委書記時，向當時來訪的美國駐華大使雷德解釋，他更傾向通過全省鐵路貨運量、用電量和銀行已放貸款量，作為指標因素來追蹤遼寧經濟變化，以擠掉統計數字的水分。
連前中國總理都咁講，以後有傻仔同你講中國經濟好掂個時，你識應啦？
作者：梁頌恆
免責聲明：此專欄屬作者個人意見，《棱角》對所發佈的信息及意見，不予承擔任何責任。
投資涉及風險，讀者需小心衡量，投資前應適當地向獨立財務及專家尋求意見。
