今日唔講波經唔講財經講吓其他。
香港律政司早前就「反送中運動」歌曲《願榮光歸香港》（下稱《願榮光》）向法庭申請禁制令，高院原訟庭拒絕後上訴。上訴庭周三（8日）根據特首證明書頒下判辭，指傳播該歌曲屬刑事行為構成國家安全風險，有迫切需要以禁制令協助，故裁定律政司上訴得直，並批出禁制令。
但我想同香港政府講：「你係禁唔到香港國歌。」
講經都要講理由，點解我咁講？
先講技術上嘅問題。假如香港政府真係攞住張禁制令去同本地網絡供應商，或者係膽粗粗嗌 Google Apple Meta 將《願榮光》落架，會發生咩事？
本地網絡供應商會答：「我做唔到㗎喎。」全世界咁多地方有《願榮光》，淨係 Youtube 上面都成千上萬啦，唔會有任何一個本地網絡供應商可以知道邊條 Youtube 連結係《願榮光》，佢哋只能控制你上唔上到 Youtube，而不可能令你係 Youtube 上聽唔到某一隻歌。
如果膽粗粗嗌 Google Apple Meta 將《願榮光》落架，會發生咩事有咩可能性？首先係《願榮光》呢首歌嘅擁有人假如佢哋唔係身在香港，擁有人上載呢首歌喺所在國家又冇犯法，其實呢個禁制令係咪真係有justification 去要Google Apple Meta 落架呢首歌？
退一步假如 Google Apple Meta 咁睇得起香港同中國市場，幫手做嘢，令香港 IP 就搵唔到《願榮光》呢首歌，咁香港人只要裝個 VPN 就已經突破咗呢個圍牆，咁呢個禁制令嘅意思又係咩？
再退一萬步，假如班科技巨頭癲到真係將呢首歌落架，佢哋輕則就要面臨自己國內 （即係美國）嘅政治輿論壓力，重則甚至會面對經濟懲罰。佢哋係咪會為咗中國同香港咁細嘅市場去冒呢個風險？
技術上我真係唔知香港政府係可以點禁歌，除非禁止喺香港用 Google Apple Meta 嘅服務囉。不過咪話我唔提埋水，用唔到佢哋嘅 service，營商環境再差落去，商家走人稅收少咗你班蛋散狗官遲早都係冇糧出㗎咋，同中國人一齊食樹皮囉應該幾好纖維嘅。
再者，不論係頭先推論嘅邊種情況，又真係禁到香港人呢首國歌咩？
你問任何一個支持民主自由嘅香港人，邊個會唔記得呢首歌？邊個會唔記得喺 2019 年時候第一次聽到呢首歌嗰時嘅動容？邊一個會唔記得 2019 年仲可以集會嘅時候播放《願榮光》嗰時會自動肅立嘅感覺？直到嗰一刻我哋先發現原來見到其他國家嘅人喺唱國歌時肅然起敬甚至激動到喊係真嘅，而唔係某神奇國家嘅特別剪接效果。
所有嘢我哋都實實在在經歷過。
一張廢紙禁制令？點禁？
作者：梁頌恆
免責聲明：此專欄屬作者個人意見，《棱角》對所發佈的信息及意見，不予承擔任何責任。
投資涉及風險，讀者需小心衡量，投資前應適當地向獨立財務及專家尋求意見。
