主頁 澳洲/亞太 【人事世界】失業率升了,是...

【人事世界】失業率升了,是禍是福?

 

統計處釋出12月嘅就業數據,失業率仍然維持低水平,卻比起之前輕微上升0.1%,因為少了大約32,000個part-time職位,而全職卻只是增加了大約17,000 ,當中相距約14,000個職位。有人力資源平台同埋顧問已經指出, 2023年嘅失業率將會攀升,有機會到達4%或以上水平,KPMG更警告, 2023年有機會流失接近15萬職位。

有評論認為失業率上升係源於將會繼續加息,企業成本增加導致需要削減人手,另一方面,由於已經過了2022年「後武肺時代」,經歷咗一年嘅「報復式消費」以及企業調整期,於招聘上採取更加謹慎嘅態度,即係唔會因為欠缺人手就隨意招聘,再加上,企業開始逐漸調整人力資源政策,「汰弱留強」嘅情況開始出現。再有更多勞動力開始補充嘅時候,失業率有機會回升並不出奇。有大公司已經開始從IT部門開刀,精簡人手。

雖然喺唔同嘅調查當中都顯示,大部份企業預期喺2023年仍然會出現人手短缺狀況,尤其是係服務性行業,以及專業方面都仍然會缺乏人才,然而,隨着企業成本不斷上升,受制於剛才提及嘅加息以及工資上揚,縱然面對人手短缺,企業都仍然會響人力資源方面繼續謹慎行事,盡量嘗試去將工作交返俾現時嘅員工,節省人手。

有一些行業仍然出現嚴重斷層,例如餐飲業仍然係人手短缺嘅重災區,一半嘅僱主於過去一年都未能夠聘請到足夠嘅人手去應付每日嘅工作,有啲甚至需要關門歇業,因為佢哋冇足夠嘅人手去營運。從澳洲統計局最近釋出嘅數據,頭五位最缺人手嘅行業為餐飲及住宿、行政支援及管理、公共行政及安全、零售服務,以及「其他專業」。

咁究竟人去咗邊呢?同樣調查喺2020年嘅時候,餐飲業大概只係得14%嘅僱主表示欠缺人手,相對喺2023年嘅差唔多去到50%相距甚遠。當然,其中原因係過去三年疫情令到好多業務需要精簡人手,現在逐漸回復正常嘅時候,當然對人手嘅渴求會重新增加,導致各行各業出現「搶人才」嘅情況。

在現時這個Bipolar(又唔夠人用之餘失業率又升)嘅就業情況之下,求職者需要更加了解所應徵企業的要求,千祈唔好喺功課都冇做嘅情況之下就去見工,因為僱主比起過去兩年對應徵者嘅要求明顯增加,寧可找到啱嘅人,都唔要個只係可以做到手頭上工作嘅人,而係要個能夠配合公司發展方向嘅同事。

根據這些資訊,你在搵工上會唔會有所調節?

作者:Sydney HR 的日與夜

關於作者:作者為一企業人事部職員,同時為合資格Life Coach,國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落,無比哀嘆,盼一盡綿力,將文化保存,以文會友,抒發一下。這篇文章,歡迎轉載。