喺職場做嘢，有陣時難免會遇到拗撬又或者喺一啲情況之下被公司或者同事投訴。當然如果係自己唔啱嘅話就梗係要企定定認咗佢啦，可惜有時候可能係因為喺工作上同同事有誤會或者甚係不幸地被針對而作出一啲虛假指控甚至乎導致要被調查停職等等嘅時候，我哋可以點樣保護自己呢？
首先第一樣嘢就係要睇吓公司嘅人事部有冇同你作出正式嘅調查要求。好多時候如果係一啲工作上嘅指控，除咗你嘅上司會進行調查以外，人事部一般都會收到通知，並且記錄在案。你係有權利向人事部索取有關資料，因為指控係指向你嘅，冇理由要食呢隻死貓。
咁我哋可唔可以要求公司對於呢個指控作出調查呢？其實係可以嘅。重要嘅係你有足夠嘅證據證明你並冇犯下嗰個錯誤或者你係無辜被屈嘅。咁我哋點樣去證明呢樣嘢呢，好多時候就係睇吓你喺公司做嘢嘅時候每一件事，你有冇用email去溝通清楚，係咪所有跟有關程序跟足指引，另外你有冇白紙黑字證明你係曾經做過或者冇做過啲嘅事件呢？呢啲你哋都要知道係有權益咁樣去做嘅。
Fairwork係有非常完善嘅機制去保障員工同埋僱主，若然大家係真係不幸遇上呢啲事件，大家千祈唔需要客氣，先呈報Fairwork，傾掂數係可以withdraw 嘅，畢竟Fairwork都唔會同自己過唔去俾嘢自己做嘅，如果你哋最後傾掂數其實就慳返佢好多時間，佢亦都唔會介意。
咁係點做嘅呢？其實喺網站嗰度已經有指引，一般你都係要填表格，而且佢亦都會問你索取你嘅供詞，包括一啲證明你係無辜嘅文件，又或者短訊佢哋都會接受。要留意，錄音同埋錄影，除非係得到當事人同意，否則嘅話你係唔可以攞佢出嚟做呈堂證供，原因係違反私隱條例。當然，若果你入職嘅時候係簽咗公司嘅Policy，而當中係有提到公司可以錄音同錄影嘅話，咁你就要同律師傾傾。
總括而言，若然你係於整個嘅事件當中係參與其中，無論你係控方定係辯方，對方所作出嘅任何對你有關嘅行動，你都應該要知道，呢個係你嘅權利。若果對方單方面要求你做一啲你感覺到可疑嘅事情，例如無啦啦叫你去托取醫學報告、又或者要你睇醫生等等，而件事其實係同佢叫你做嘅呢一啲事件係無關嘅話呢，你係有權拒絕。你亦都要非常留意對方所出嘅任何書面陳述，睇清楚佢裏便所講嗰件事同你嘅認知係咪有出入。我唔止處理過一單啲咁嘅case，即係話佢明明入稟嘅時候係原因A，然後俾你嘅陳詞就變成咗原因B。如果你一個唔覺意冇留意的話，咁成件事就可能唔同晒，個結果可以好唔一樣。
記住，有法治嘅地方唔代表班友唔蠱惑，只係有法律可以幫助你有個公平嘅調查，若然你依然係對件事係有疑問疑惑嘅話，喺許可嘅情況之下，搵律師徵求法律意見係你最好嘅方法。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
