最近同唔同嘅僱主傾開偈，再加上自己嘅一啲觀察，近年嚟到澳洲嘅新移民喺搵工上邊，都遇到唔同嘅困難。當然，有冇本地經驗係其中一個非常關鍵嘅問題，同時間，亦都唔好忽略佢哋喺搵工時候所抱有嘅心態。原因係有僱主同我哋講，佢哋發現新移民好多都有幾個唔同嘅expectation，而呢啲嘅期望，好多時候同現實係會有一段嘅距離。我當然唔係要喺度一竹篙打一船人，呢個係一個對大家嘅提醒，亦都係要注意嘅地方。
先唔好討論你能唔能夠搵返自己嗰行，如果你係技術移民嘅話，咁你當然冇問題啦，因為可能已經有公司請咗你。如果你係回流，喺呢度搵工嘅話，就有機會處處碰壁。就算你真係能夠搵返你自己喺香港做緊嘅職業，你份人工起碼唔見三份一以上。舉個例子吧，你喺香港搵開三萬蚊左右一個月，即係大約五千零蚊澳元。香港嘅稅率低，基礎上呢三萬蚊你可能全部都可以袋袋平安。喺澳洲，你要能夠每個月可以袋到五千零蚊，你嘅年薪坐底要八萬五。假若你係公司高層，人工差不多十萬八萬一個月嘅話，咁你唔使點諗喇，呢度廿幾萬年薪嘅話，你淨係交稅都冇咗起碼40%，七除八扣後，你可能月薪計返港紙都係得返六皮幾嘢。呢一點大家係必須要留意嘅，因為實在見過太多個案係喺香港嘅高薪一族，嚟到發現原來係搵唔返之前嘅入息，仲要係差九條街，呢個心理關口，非常之難過。
第二樣嘢就係返工嘅模式。有時候喺澳洲就算你做到幾高級，除非你喺啲超級大行下邊有幾十條𡃁跟住你，否則嘅話好多嘢你都要自己做。例如你要自己落site，落手落腳測量、執嘢、甚至打電話去訂嘢、book枱等等⋯⋯好多時候係冇人會幫你嘅。你估都估唔到，洗碗倒垃圾可能都關你事。另外你喺香港做嘢做到夜一夜嗰種模式，嚟到呢度當然翻天覆地，分分鐘5:30 pm個Office已經吉咗，清潔阿姐會走來趕你走。
所以你唔難睇到，心態調節係非常重要嘅。如果依然抱住可以得到返同你以前無論係待遇、工作模式、意識形態係差唔多嘅工作嘅話，就非常之現實。就算你見得成份工，過得一兩個月你都會覺得好難捱，因為同你想像中完全不一樣。當然我唔係話個個都一定係咁，係見到好多囉。
希望大家唔好覺得我喺度放負，discourage 大家。咁樣講都係因為觀察所得，希望再次提醒各位需要有合理嘅期望。身邊都有一啲朋友係明白唔能夠得到以前喺香港嘅待遇，便放下身段，慢慢重新適應過，好多都好快就能夠闖出一片天，雖則人工都仍然追唔到㗎啦，起碼係工作上都得到滿足。
大家要記住，嚟澳洲所追求嘅係更好嘅living quality，係能夠有更加多同家人一齊嘅時間。始終，澳洲一定唔係幫你搵大錢嘅地方。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
