5月5日，澳洲儲備銀行（RBA）宣布將現金利率上調0.25厘至4.35%，並警告，由於燃油價格上升以及經濟再次出現產能壓力，通脹率可能會喺一段時間內持續高於2%至3%目標區間。
雖然RBA堅稱信貸對家庭同企業而言仍然「容易取得」，而勞工市場亦仍然「偏緊」，但商界團體、工會同人力平台就警告，最新加息將進一步加重財務壓力，加速非穩定工作增長，並提高「滯脹（stagflation）」風險。
Deputy CFO Emma Seymour 表示，今輪加息周期最大特點，係正快速改變整個工作結構。她指出：「我哋見到企業喺編更方面變得更加保守，重點由增長轉為控制風險。以前公司會按需求預測安排更表，而家好多企業基本上只係控制成本。」
Deputy 數據顯示，2026年初總工時及輪班數量已下跌6%至8%。呢種急速收縮，正削弱餐飲、零售、醫療及其他輪班行業員工嘅收入穩定性。Seymour警告，若輪班工人無法依靠穩定工時，佢哋將更難預算租金、交通，甚至托兒開支。不穩定工作直接影響生計同消費能力，進一步拖慢經濟循環，形成骨牌效應。
不少工人因此開始重新安排工作模式，包括同時做多份工作、喺不同僱主之間疊更，以及將「彈性」放喺「穩定」之前，只為維持基本收入。
工作碎片化（fragmentation of work）似乎正慢慢形成，甚至開始變成新常態。雖然更多人有工作，但往往分散喺多個職位，而且缺乏穩定工時同保障。對工人同企業而言，當大家都想建立穩定、有經驗嘅輪班團隊時，呢種情況自然會帶來實際問題：部分高流失、低保障工種長期請唔到人；但另一方面，穩定全職職位競爭亦愈來愈激烈。同時人員流失亦會增加，因為對好多散工而言，反正本身保障有限，自然邊度人工高少少就去邊度，follow the money。
RBA今次決定，反映央行擔心2025年下半年已明顯回升嘅通脹，會因中東衝突以及燃油與商品價格上漲，再次被推高。雖然央行最新預測已假設衝突最終緩和、燃油價格回落，但仍預期核心通脹將高於原先估計。
與此同時，家庭支出壓力仍然持續。租金、燃油同能源價格未有明顯回落，意味工人正喺工時未恢復情況下，被迫承受更高生活成本。
澳洲工會理事會（ACTU）批評，RBA正要求工人承擔一啲根本唔係由佢哋造成嘅通脹壓力。根據工會估算，今次已係連續第三次加息，一個平均73.6萬澳元按揭，每月供款將增加約110澳元，而好多家庭本身已經非常吃力。
ACTU引用研究指出，企業利潤曾經係上一輪通脹急升主要推手之一。如果企業再將燃油同能源成本轉嫁消費者，工人將面對另一輪物價上升，同時仲要承受更高樓價同借貸成本。而依賴 basic award wage 嘅工人尤其脆弱：46%屬租客，高於其他工作家庭約34%；另外，多達40%亦同時供緊樓。
ACTU秘書長 Sally McManus 表示：「護士、教師同技工唔應該成為海外危機嘅減震器。」她認為，加息「唔會令汽油平啲，亦唔會打開霍爾木茲海峽」，但卻會真實傷害普通家庭。
對中小企（SMEs）而言，RBA今次決定最直接影響，就係借貸成本上升以及利潤進一步收窄。人力資源平台 Employment Hero 指出，今次加息實際上已抵消去年三次減息效果，反映RBA即使面對經濟衰退風險升溫，仍然決心控制通脹。
平台亞太區董事總經理 James Keene 表示：「今日加息將進一步迫使澳洲企業進入防守狀態。我哋數據已見到，中小企開始減少招聘，同時延遲投資，因為借貸成本上升，而消費需求正在轉弱。」
而呢種緊縮政策亦直接影響勞工市場。數據顯示，臨時工增長速度已超過全職職位兩倍，按年增長9.2%，因為企業希望避免喺不確定環境下承擔長期人力成本。同時，工資增長已連續三個月停滯，幾乎睇唔到改善跡象。
RBA亦承認，全球局勢緊張加上本地生活成本危機，已經打擊企業及消費者信心。雖然唔少公司收入仍算穩定，但成本上升正壓縮利潤空間。企業而家面對一個殘酷選擇：要麼自行吸收成本並削減招聘及工時，要麼將成本轉嫁消費者，但冒住流失客戶風險。
澳洲工業集團（Ai Group）更警告，今次加息已正式敲響「滯脹」警鐘——即低增長加高通脹同時出現。Ai Group行政總裁 Innes Willox 指出，RBA最新預測顯示，今年底經濟增長將跌至只有1.3%，企業投資同家庭消費都預計下跌，而通脹則可能喺6月升至4.8%，並至少再需要一年時間先回落。
雖然增長前景轉差，但RBA仍強調勞工市場依然偏緊。3月失業率為4.3%，並預計今年底仍維持同一水平。不過，對好多工人而言，失業率數字根本未能反映真實處境。工時減少、輪班更難預測，愈來愈多人需要兼幾份工先足夠生活。臨時工同零工經濟增長速度，亦遠高於穩定全職工作。
RBA行長 Michele Bullock 形容，目前環境係「非常、非常困難時期」，但她仍堅持，控制通脹對保障中期實際收入屬必要措施。而RBA董事局表示，將會「密切留意數據」，並「採取一切必要措施」去達成物價穩定及充分就業目標。
隨住下一次議息會議將於6月中舉行，加上聯邦預算案即將公布，企業同工人都密切關注：政府財政政策會否分擔更多壓力，以及壓抑通脹代價，會否係一個更脆弱、更碎片化嘅勞工市場。
作者：Sydney HR 的日與夜
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
