呢排其實都寫咗好多有關 AI 嘅文章，當中當然談論過 AI 喺職場嘅運用，同埋點樣影響現時嘅職場生態。由評論角度出發，其實已經有好多唔同嘅討論，我反而冇乜真正分享過自己親身使用 AI 嘅經驗。所以，不如就趁今次呢個機會，同大家分享一下我運用人工智能嘅一啲體會，佢究竟點樣將我今日喺人事工作上嘅模式，幾乎可以話係翻天覆地咁改變。
我喺工作上除咗要面對日常一啲人事問題，例如薪酬、招聘，甚至員工投訴之外，呢啲其實人工智能未必完全幫到手。對我嚟講，AI 最大嘅用途，第一係可以幫我快速過目文件，將內容重新整理、格式化，用字更加精準，語文表達亦更加流暢。第二就係一啲分析性文件，例如向管理層提交報告，需要將唔同資訊整合，再逐一提出分析同建議。喺呢方面，AI 的確幫到唔少，佢可以好快將大量資料整理，亦可以寫出一份相當完整同有條理嘅分析。不過，當涉及公司當前嘅實際環境、文化，甚至管理層嘅取向時，AI 始終未必能夠作出真正貼地、具有人性化嘅判斷，呢一部分仍然需要靠自己去調整。
第三個用途，就係幫助我建立 Training & Development 相關嘅文件。如果用人手去做，同一項工作可能需要花上幾日時間；但而家只需要輸入幾個關鍵字，AI 已經可以產生一份初稿，再根據公司實際情況逐步修改，之後放返入 AI 再 refine 一次，一份基本上已經可以使用嘅文件就完成。整個過程至少節省咗七成時間。我自己真係喺呢方面受惠唔少，有時朝頭早開完會，發覺有啲事情需要即時處理，下晝已經可以將文件完成，甚至進入測試階段。相比以前動輒要一兩日先完成，效率真係快得有啲誇張。
誠然，人工智能並非萬能。頭先講到能夠有咁快嘅產出，除咗因為 AI 可以用極短時間喺網上搜尋、整合同分析資料之外，使用者本身都必須具備足夠嘅專業知識，先至可以真正做到事半功倍。淨係識得打幾隻字，AI 出嚟嘅內容究竟啱定錯，可能連使用者自己都冇能力判斷。所以我成日都話：「成也 AI，敗也 AI。」至少到今日呢一刻，AI 確實可以提供好多有邏輯嘅分析，亦可以代替人類完成大量重複性工作。然而，一去到真正需要 decision making，又或者要為 AI 嘅 output 提供理據、承擔責任同作出最後判斷嘅時候，人類依然係無可取代。
其實，我愈用 AI，就愈覺得佢唔係用嚟取代專業人士，而係放大專業人士嘅能力。能力愈高嘅人，愈識得點樣利用 AI 去提升效率；相反，如果本身缺乏知識同經驗，AI 反而可能令人更加依賴錯誤資訊，甚至做出錯誤決定，懲教署做出嚟嘅嗰四位AI女仔廣告，就係一個絕佳嘅例子。工具始終都係工具，真正決定成果嘅，仍然係使用工具嘅人。
作者：Sydney HR 的日與夜
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
