上星期同大家睇咗2024年嘅澳洲就業展望，今個星期就同大家分享返2024年嘅職場趨勢。其實之前都已經喺好多唔同嘅文章度同大家分享咗，近日有更加多唔同嘅行業巨頭作出分享，整合之後有幾個趨勢可以同大家討論一下。
首先喺澳洲最熱門嘅其中一個topic就係男女同工同酬。諮詢文件同埋先導計劃喺舊年已經開始，法例規定所有企業必須遵守並且每年提交報告，匯報公司男女比例以及薪酬差距。100人或以上公司必須呈交報告，500人或以上公司更需要設立Policy。BHP嘅人事總監已經表示，呢項計劃將會令到公司百上加斤，因為有大量嘅報告需要撰寫，而且對業務基礎上係沒有幫助的。這個題目會另闢文章同大家分析；然而我哋睇到個趨勢會係女性嘅薪酬將會因此有所遞增，企業由於被法例規範，必須調節男女比例，即係話女性求職者喺今年搵工相對會比較容易。
另外有啲行業亦都係繼續處於人手極度不足嘅狀態，例如工程師。BHP亦都同時表示，喺過去約10年，於本地畢業嘅工程師比例已經下降超過70%，而且有近半數嘅工程師於未來10年會年屆退休年齡。有鑒於此，有經驗嘅工程師好多時候係需要從外地引入，本地嘅工程師畢業生買少見少。
而跟住呢個嘅趨勢，我相信大家都唔會陌生，就是AI，AI，還是AI。無論係智能人工客服，還是Internal所作的desktop research，甚至係一啲基本嘅商業文件，例如撰寫會議程序、將冗長嘅文件撮要等等，企業使用AI嘅比重只會越來越高。使用AI並不一定係在公海的那種像Chat GPT，有大企業已經自行研發內部AI，有銀行甚至已經完全使用人工智能篩選求職者，需要履歷內含有關鍵詞，才會選出考慮。學習與AI共存已經是大趨勢，亦都肯定係2024年其中最重要嘅一項職場改變。
疫情過後，在家工作（WFH）變得流行，甚至理所當然。有些求職者甚至認為能夠在家工作是企業應該給予的「基礎要求」。先撇除Fairwork對在家工作的要求，唔少大企業已經從2023年開始陸續表明希望員工能夠重新回到辦公室上班，而呢個趨勢會持續。有企業甚至表明年終獎金將會與出勤率掛鉤，鼓勵員工多回到辦公室上班。這好有機會係基於企業未能夠確定員工在家是否「真正」在工作而作出的決定。同時間，有些企業仍然對在家工作感到樂觀，因此求職者喺搵工嘅時候一定要了解企業對WFH嘅要求同睇法，唔好一廂情願以為呢個大趨勢所有公司都會跟。
好，講住咁多先，嚟緊仲會繼續有唔同有關2024年趨勢嘅一啲講座，聽完再同大家分享。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
支持我們：https://points-media.com/supports/
