一不離二，不如第二篇就講吓身邊嘅人。
多謝大家賞面。上一篇出完之後，有人對於提及同伴係好隊友定係豬隊友好有感觸…
同伴有好多種：可以係家人、可以係你朋友、亦都可以係你嘅伴侶（結咗婚、未結婚）。喺我哋人生唔同嘅階段，都有好多唔同嘅同行者。即將到而立之年嘅我，開始體會到身邊嘅人，總係一波波噉嚟，一波波噉走。剎那嘅光輝唔係永恆，人生去到最尾都會係孤獨嘅 — 自己先至最重要，眼前嘅嗰一位先至最重要。
喺作出移民呢個決定嘅時候必然會將你身邊嘅嗰一位納入你嘅計劃。不論嗰個係家人，定係你當時嘅伴侶。移民呢一個大決定，你必須要將佢帶喺身邊，因為佢係當時對你最重要嘅人。上一篇有講到，每個人對於移居嘅反應都唔同，喺壓力之下一啲以前唔為意嘅小問題、溝通問題，好容易就會浮上面。 相信大家聽過唔少案例：移咗民之後因為適應中間出現咗好多磨擦，最後好可惜兩個人要分道揚鑣，甚至會出現分開咗之後就要返香港嘅局面…
有同行者，當然就係好。比起你孤獨走呢一轉路，你得到嘅係兩雙手，而唔係只有你一雙手。所謂搬搬抬抬時多一對手都會方便啲。我相信每一段關係嘅相處方式都唔同，有啲人需要比較多對話/ 有啲人多啲Skinship，磨擦就會減少。從來都唔會有一本通書可以讀到老，只能夠靠雙方慢慢去摸索，以及雙方嘅努力調整、讓步。一隻手掌拍唔響都係呢一個道理。好多時搵我傾偈嘅朋友，都係想努力嘅一方，覺得自己攰喇，另一半都攰喇，唔知可以點做，好辛苦，好唔開心… 我大部份時間比嘅建議係：「溝通溝通，唔溝一日都唔會通」，先盡力表達自己心入面嗰句，而唔係比意氣說話傷人心又講唔出重點。之後如果你已經盡咗力，咁就請揀對自己最好嘅方案，照顧好自己先，一定要對自己好啲：記得，要愛自己，先至可以愛人。
上面講嘅溝通唔局限於你嘅伴侶。正如我開頭所講，可以係你嘅家人，可以係你嘅朋友，只要係目前喺你身邊最親近、最重要嘅人。移民呢一個動作涉及嘅轉變好大，不論你有冇同伴喺身邊都好，最緊要係互相扶持，大家加油。即使物理上我哋呢一群人已經離散，心靈上希望大家依然維持聯繫，香港人大家撐大家，一齊撐落去。
—
細粒姑娘instagram：https://www.instagram.com/littlepsynurseaus/
2024嘅細粒姑挑戰新corner！
細粒姑娘嘅隨筆噏
精神唔再係講病，而係點樣達至精神健康
每一期，兩個字做標題
可以係某一個階段
可以係某一個徵狀
希望可以及時補充你嘅能量
繼續喺異地撐住你嘅香港人生
