主頁 澳洲/亞太 【人事世界】2月份澳洲就業...

【人事世界】2月份澳洲就業數據 – Sydney HR人與夜

統計處最新就業數據出台,調整後嘅失業率進一步下跌至3.7%,比起上一個月嘅3.9%仲要低,超出市場預期。喺對上一次都同大家分享過,我預期嘅失業率係應該會繼續輕微攀升又或者繼續停留於3.9%,呢次釋出嘅數據亦都係超乎我意料之外。

統計處解釋原因係有大量新移民湧入,填補職位空缺,導致失業率放緩。澳洲人口現時已經突破二千七百萬 ,對比兩年前大概二千六百萬已經多出一百萬 ,去年引入嘅新移民數目差不多接近六十萬 ,以需要半年左右去settle down計算,今年年初的而且確係佢哋開始投入勞動市場嘅時間。

當然,呢個數據可能係同佢嘅調查方式有關,有機會未能夠百分百反映真實市場狀況,同時間喺統計學上我哋可以留意,如果你一直都係用相同嘅統計方式而出現嘅走勢,多少都能夠代表到市場嘅狀況,所以用距離分析走勢都仍然係可信嘅。

我為此翻查過去10年嘅紀錄,每年二月嘅失業率對比起一月基礎上都係一樣,又或者只係相差0.1%,相距0.2%嘅只有三年。當然差距只係得0.1%並唔係非常之significant,整個嘅勞動市場走勢現時都仍然係指向失業率將會繼續輕微攀升,相信回落係除咗受惠於剛才所講嘅人口遷移以外,假期過後新增職位增加,連中獎金大部份公司都已經發放,一般都係轉工嘅時候,因而推高就業率也不足為奇。

咁增加咗0.2%係一個咩嘅概念呢,根據統計處嘅數字,在職人口即係大約增加咗26,700人左右,男女性就業比例依然有17%嘅差距,即係男性嘅就業率比女性高;隨着性別平等條例更新同埋鼓勵女性就業,資料亦都顯示,女性嘅就業比例升幅率比男性稍為偏高,預期今年會繼續與男性整體就業率差距收窄。

雖然失業率二月稍為放緩,個人仍然保持失業率會繼續輕微攀升嘅預期,到年尾嘅預測我仍然係維持4.1%,雖然澳洲有機會去到年底開始減息,然而依然受到高息環境嘅影響,企業營運上會繼續處於艱難時期,暫停職位招聘甚至扣減人手仍然有機會於下半年繼續發酵。

作者:Sydney HR 的日與夜

關於作者:作者為一企業人事部職員,同時為合資格Life Coach,國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落,無比哀嘆,盼一盡綿力,將文化保存,以文會友,抒發一下。這篇文章,歡迎轉載。

支持我們:https://points-media.com/supports/