主頁 博客 【人事世界】中層管理真係咁...

【人事世界】中層管理真係咁難搵?

人口老化唔係淨係某一個地區面對緊嘅問題,其實全球現時都正在受人口老化嘅影響,我哋可以話而家中層管理係直接受到全球人口demographic嘅更改而出現斷層。

若然根據澳洲統計局最新釋出數據,40至54歲嘅人口,只係佔全澳洲人口嘅19.3%,55到74歲嘅,反而達到21.5%,25到39歲,亦都係21.5%。你可能話,咁又點呢?同你嘅詮釋有啲咩關係呢?

首先我哋可以睇返呢個年齡組別嘅分類方法,係就住社會學家廣泛認為唔同世代嘅組群去區分嘅,例如25到39歲係氾指為千禧代,40到54歲係X世代,而55歲到74歲就係屬於Baby Boomer。若然我哋去睇返Baby Boomer嘅人口結構,佢哋大部份都有好多嘅兄弟姊妹,因為佢哋嘅父母生養眾多,畢竟經歷咗兩次嘅世界大戰之後人口銳減,各國普遍鼓勵生育,因此佢哋而家嘅整體人口比佔係相對高嘅。反而X世代,即係剛才baby boomers後代,好多都係獨子獨女又或者只係得一個兄弟姊妹,所以長大後人口佔比比較少;相對佢哋嘅後代, X世代嘅生育率比起佢哋嘅爸爸媽媽高,所以25-39稅嘅人口比例又會升返。

呢個人口嘅佔比分布同我想討論嘅題目有咩關係呢?當40歲到54歲嘅人口減少,意味着勞動人口亦都減少。55歲或以上嘅人口,除咗因為科技進步醫療發達,佢哋可以延長退休以外,同時亦都會出現一個喺職場裏面青黃不接嘅現象,因為佢退咗休之後好有可能係搵唔到中層管理去接替佢哋嘅位置。呢個我哋喺香港可以睇到係非常之明顯嘅,當然,香港發生呢件事係同其他嘅事件有直接關係啦,然而我哋從中睇到嘅影響就好相類似。

最明顯嘅就係喺企業會因為少咗能夠make到decision嘅中層管理,又或者有足夠經驗去make decision 嘅管理層,會令到營商過程出現好多嘅錯判又或者失誤,從而招致延誤或損失。而中層管理亦都睇得好清楚自己嘅優勢,所以人工水漲船高,令到基層員工同佢哋嘅薪酬差距越發擴大。

呢個現象喺企業招聘嘅時候唔多唔少都能夠反映到,例如基層員工嘅競爭會係激烈嘅,可能係幾十人爭一個位,而去到中層管理,你收到十零份履歷都已經算係好難得。仲要係嗰班人全部都獅子開大口,冇計,鬼叫個市場冇人咩,睇啱嘅貴啲都要俾。

再加上澳洲現時面對經濟下行嘅風險,除非你出手非常吸引,否則大部份嘅中層管理都寧可按兵不動,免得有咩冬瓜豆腐就俾人開刀。

作者:Sydney HR 的日與夜

關於作者:作者為一企業人事部職員,同時為合資格Life Coach,國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落,無比哀嘆,盼一盡綿力,將文化保存,以文會友,抒發一下。這篇文章,歡迎轉載。

支持我們:https://points-media.com/supports/