呢個問題呢我記得好似係好耐之前曾經討論過，點解左一次攞返出嚟呢就當然係呢排嘅市場都係充斥着轉工嘅朋友啦，個個都有好多唔同嘅原因。近日有另外一位朋友離職，佢談及到公司嘅Toxic文化，令到每幾年就成個公司換血，情況令人側目。
因為公司文化實在太毒，朋友頂唔順都經常打嚟呻，我聽落覺得去到已經有分享嘅價值，可以搵嚟做咗個case study等大家睇到乜嘢叫做一個趕客嘅職場文化。
首先朋友表示，佢經理有一個非常獨特嘅管理方法，佢同朋友講，管理下屬最緊要就係建立威信，下屬係需要「怕咗佢」，否則嘅話就會唔聽話。呢個係完全違背澳洲職場文化，喺澳洲最緊要係乜嘢呢？其實就係喺嗰個工作場所裏邊大家互相尊重，並唔係因為你職級比其他人高，你就可以黑起塊面做人，喺度指指貢。返工唔係受氣，你點對人人哋點對你，你下下嘢惡言相向，有Credit就係你攞，有鑊就下屬孭，肯跟你做嘢先奇啦。
另外以身作則都非常重要，口口聲聲話大家要準時返工，自己就日日遲到，但係就會喺個系統度將啲遲到嘅同事捉出嚟鬧，又話出警告信，又話要罰。你自己一個禮拜五日可能三日唔見人，再唔係就十點幾十一點先蒲頭，咁你叫人點樣服你呀？
你可能話，啲老細都好universal，香港都有啦，有咩咁特別啫？特別在你喺澳洲呀嘛？用個咁樣嘅態度去對待員工，其實就喺度搵自己笨。一來係而家嘅就業情況，人已經難請，你個工作環境同埋文化咁Toxic，想留低員工都幾難。另外大家都知澳洲係有好多法例保障員工，你咁惡，一個唔覺意心靈受創個staff就走去Fairwork告你bully，先唔好講告唔告得入啦，淨係用咗嘅時間人力物力，嗰啲都係錢嚟㗎。
員工不嬲都係公司最重要嘅資產，除非個老闆覺得自己係萬能，乜嘢佢都可以自己搞掂，否則平日與員工相處，點都唔需要下下發佢脾氣啩，畢竟佢都係為你工作，幫你手打江山，犯不着下下啄住晒，搞到關係咁惡劣吖。
朋友條氣最唔順嘅係，佢辭咗職之後，老細竟然唔要求佢跟住個三個月都暫時唔好搵工，費事自己冇面，喂大佬咩道理呀！呢啲咪就係沒有最 cheap只有更 cheap囉。
呢啲就係喺管理層面嘅有毒文化，咁你員工層面又點樣會形成有毒文化呢？下次再談。
作者：Sydney HR 的日與夜
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
