包括袁弓夷在內等海外港人發起籌建「香港議會」（Hong Kong Parliament），籌委會周二（1日）在倫敦舉行記者會，宣布計劃今年底舉行首屆選舉。不過身處香港的前區議員、葵青區議會副主席張文龍在 Facebook 公開撰文，批評「香港議會」以「香港」自稱，實際上有很多香港人既無法參與，也可能無機會受其影響，「件事就會非常之咁唔『香港』」。他形容自己作為「仍喺香港『偷生』嘅民主人士」，「我會覺得唔舒服，甚至厭惡。」
張文龍又指，過往香港民主運動為人詬病之處，「就係花極多心神去水人投票，卻無好好話到俾香港人聽應該點樣去做香港人」，期望海外港人社群能夠思考如何在現今科技、經濟、文化急速變幻的時代，「搵到多啲香港人嘅位置，少一啲重蹈覆轍」，「最緊要係記住仲有好多好似我咁滯港嘅『旅港港僑』存在」。
張文龍帖文標題為「作為滯港前議員，我厭惡有樣嘢叫『香港議會』」。張文首指，本自覺不應公開評論海外港人組織工作，一來因對其不熟悉，二來海外有海外的處境，「但實在今次有好強烈感受，覺得有需要冒下會被人六點鐘拍門同時又被成條電子唐人街唱嘅風險講兩句。」
張指，自離港潮起，「香港人」已由一地之民，轉化為跨國際社群，「各為其主得嚟又要維繫感情同處理糾紛嘅時候，靠嘅就好難係一個硬綁綁嘅制度框架」；他指，但當大家都用「香港人」自稱，卻無法逃避始終香港才是有最多香港人的地方的事實。
張指，希望難得有空間從崎形選舉制度中抽身的海外港人社群，「多一啲諗點樣喺呢個科技、經濟、文化正急速變幻，傳統政治同學術框架難以應對嘅時代，搵到多啲香港人嘅位置，少一啲重蹈覆轍」，特別謹記仍有不少「旅港港僑」留在香港。
張強調，仍然感謝海外港人對在地港人的關懷，但非常希望大家會留意港人已成為跨越國界社群，「凡事諗多清諗楚一啲，去搵返條屬於21世紀香港人可以跨越國界咁一齊行嘅路。」
張又指，正如他當日參選所言「投票不必然帶來希望」，「更多嘅心機其實係值得花喺日常生活嘅細節度，畢竟我覺得我哋嘅目標最應該係點樣去做香港人，無論活喺咩嘢政府之下。」
「香港議會」籌委會周二（1日）在倫敦舉行首場記者會，出席者包括袁弓夷、鄭文傑，以及網台「升旗易得道」主持人蔡明達。袁弓夷表示第一屆選舉預計在今年底舉行，暫定以不記名網上普選的方式選出35席。袁弓夷指，期望「香港議會」作為港人討論香港前途的平台，又呼籲過去於香港透過直選選出的前議員參與。鄭文傑表明會考慮參選。
棱角編輯部
