又係時候同大家一齊睇返澳洲最新嘅就業數據，而家我哋講緊嘅係六月份統計局所䆁出嘅數字。
下面數據係根據季節調整：現時失業率維持於4.1%，同過兩個月以嚟嘅百分比差唔多，預期會繼續輕微攀升；就業人為14,406,100人，而就業與人口的比率，即15歲及以上人口的就業比例，上升至64.2%，升0.1%；就業不足率降至6.5%，下降0.2%，而每月工作小時數增加到19.67億小時。新增職位為42,300，增幅率是0.3%。
喺唔同州份方面，澳洲主要三個省份，新州失業率為3.9%，維州4.5%，昆州4.0%。維州失業率高企，有分析指係由於大量新移民落戶維州，而新增職位未能追上，從而推高失業率；另外，傳統工業例如製造業繼續式微，再加上經濟下行，亦都直接衝擊就業數據。相對新州，傳統工業早已轉型，而人口增長速度亦都不及維州，加上好多大型企業嘅總部都仍然選擇在新州落腳，職位比率，因此仍然比其他州份為高。
青年失業率方面，9.6%比起整體失業率高出超過一倍。傳統原因喺唔同嘅文章同埋video都已經同大家分享過，例如缺乏經驗、沒有足夠的人際網絡、傳統工業沒落以致缺少基層職位等等，都係構成青年人高失業率嘅原因。
下半年嘅展望我仍然維持失業率係會上升至至少4.5%，原本市場預期聯邦儲備銀行會減息，但通脹持續高企，而家唔加都已經多謝晒。經濟學家認為，6月份失業率小幅上升不足以改變聯邦儲備銀行下個月的利率決策。從不同渠道的消息，各大企業開始出現裁員，亦都有連鎖企業未能在經濟下行嘅情況繼續經營而結業。西澳礦業亦都因為外圍政治影響而需要削減職位，我對於嚟緊嘅聖誕檔期，澳洲人嘅消費將有機會冇過去一年咁疏爽，從而影響零售及餐飲業的聖誕檔期職位。
預期半職（Part-time）或兼職（Casual）職位將會持續增長，現時part-time已經佔整個workforce嘅大約三份一左右，喺經濟持續下行嘅情況之下，企業將會越嚟越着重去使用呢一啲短期員工以節省開銷。我哋會繼續留意就業市場嘅走勢，有咩改變會再喺度同大家報道。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
