一到聖誕節又係人事部其中一個最頭痕嘅日子，因為一連串唔同嘅聖誕節目，例如Christmas party、24號應唔應該早放？甚至跟住嘅31號要唔要早放等等，呢啲都係由人事部announce，做好人定做衰人就係睇老細決定。
喺澳洲聖誕節可以話係全年最大嘅假期，因為連埋新年嘅話，會係全年其中一個請最少㗎，但係可以將假期最大化嘅日子。今年嘅25、26號係位於星期三同埋星期四，即係話你只係需要請23、24、同27號三日，你就可以連續攞到九日嘅假期；有啲會攞埋跟住嗰個禮拜嘅四日，咁加加埋埋呢，請七日假，你就可以有16日嘅假期。而家講俾你知其實已經有啲太遲啦，因為要請假嘅一般嚟講都已經請晒。
另外就係有關呢個聖誕節公司所舉行嘅party，有啲公司會係食晏晝，有啲會係食夜晚，晏晝嗰啲梗係平啲啦。一般同事都會鍾意食晏嘅，因為始終都仍然係屬於上班時間，唔會阻礙佢哋放工之後要去嘅地方，有啲公司呢就會鍾意夜晚食，一般嚟講呢都會搞大佢嘅，例如會提供酒水、又或者去一啲比較相對嚟講高級啲嘅餐廳去慶祝聖誕。我自己呢就晏晝同埋夜晚都幫公司搞過，夜晚嘅budget呢可以話係晏晝嘅Double。
咁我哋去呢一啲嘅派對場合有啲咩要留意呢？一般嚟講大家一定要注意嘅就係飲酒。因為你參加呢一啲嘅公司聚會係屬於工作嘅其中一部份，如果係食晏而你飲咗酒嘅話呢，好多公司呢都未必會俾你返返工嘅，尤其是如果你嘅工作係涉及需要操作機械嘅話，飲咗酒就一定唔俾做㗎啦，你就可能需要請假又或者公司皇恩浩蕩唔計你假期但係就俾你放工。就算你話唔係喎我係去夜晚嗰啲喎，你一樣唔好飲到啤啤夫，要搵日送你返屋企就無謂啦，一陣間如果嗰晚有埋啲客喺度就真係失禮晒。
根據WHS（Work Health and Safety），你話我八股都要話你知㗎喇，PCBU（Person Conducting a Business or Undertaking），簡單嚟講即係你老闆，係需要履行佢嘅職責，即係話要提供一個安全嘅「工作」環境，即係話就算你係開緊聖誕party，都唔可以俾你有任何嘅意外。萬一你因為醉酒而發生任何意外嘅話，HR同埋你個部門主管就會齊齊賴嘢，有report要寫。咁你明白點解係呢啲咁嘅喜慶日子，人事部都高度戒備，提醒大家玩時玩，唔好玩咁大。
我最過癮嘅一次就係負責搞夜晚嘅聖誕party，之前嘅HR冇好好控制飲酒呢個問題，最後係有小部份人飲醉酒打交，要call埋白車。於是乎嗰年我就拍心口話唔會有任何人飲醉，部門阿頭話祝我好運睇吓我有咩辦法。好簡單啫，首先出咗個email俾所有部門主管，警告任何人飲醉酒嘅話呢就會紀律處分，然後當晚巡場林咁樣逐枱逐枱𥄫住，睇吓有冇人亂嚟。另外，每個人我只係派咗兩張嘅酒卷，即係話最多吧枱度攞兩杯。晚飯係7:00pm左右開始，我只喺枱面放咗汽水橙汁同埋水，去到八點我先至每枱放一支紅酒同一支白酒。班友已經飲汽水同埋飲橙汁加埋食嘢晾住晒，最後飲唔到幾多杯酒。成場三百幾人左右吧，最後只係得一個人飲醉。阿頭最後對住我寫個服字，話我係得嘅。
食晏嘅話，喺一啲Clubhouse佢喺外邊係會有酒精飲品售賣，一般公司都唔會阻止同事去買酒精飲品嘅，入到嚟坐低都會同大家溫馨提示，飲咗酒就唔好返公司，而Clubhouse都有secure睇住唔會俾你飲醉啦。
記住呀，聖誕節普天同慶，公司同大家食餐飯，感謝大家一年來嘅辛勞，就唔好公司出錢你出命，適可而止方是上策。
作者：Sydney HR 的日與夜
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
