啱啱睇到香港傳媒《香港01》報道，話有啲僱主唔會請從外國回流返香港嘅人，因為話佢哋「冇毅力唔捱得」，又話已經離開咗香港一排，「適應能力有問題」，而且有事情亦都傾向「歸咎其他人」。雖然佢喺上面都有講過話移民或者去過外國嘅人係有「國際視野」，然而後邊講嘅嘢先至係佢文章嘅重點；先唔去談論香港點解會出現大量移民潮同埋有人選擇回流，呢個大家心知肚明啦，反而係上邊佢提出嘅原因，若然我哋睇返澳洲嘅職場，又有冇任何嘅Insight呢？
首先回答咗題目嘅問題，移民係咪蝕底啲？某程度上係成立嘅。因為有一啲嘅工作的確係需要比較多嘅本土經驗先至可以處理，例如比較高端嘅銷售，又或者係一啲行業內需要有非常好人際網絡嘅職位，咁你作為一個新移民就當然冇呢個優勢。有好多工作係依靠你個人網絡去拉攏生意嘅，初到貴景嘅時候就當然非常困難，明顯會有個弱勢。
相反，一啲比較係Technical嘅工作，例如電子工程師、軟件工程師等等，又或者係喺高級食店裏便嘅主廚，就未必太有關係，最緊要識講英文同埋能夠帶領到團隊就已經足夠。所以唔能夠一概而論移民係咪喺澳洲冇優勢，係一啲基礎嘅行業例如製造業、倉庫、飲食同零售等等新移民反而擁有優勢喺度，因為一般嚟講都比較冇咁高嘅要求，畢竟佢哋都希望能夠先攞到本土工作經驗，相對嚟講可能比local更加穩定。
另一個問題就當然有啲僱主話係文化問題啦，例如平常嘅工作習慣，對本土文化嘅認識等等，有啲僱主睇得比較重。喺呢啲時候，新移民的確有機會係冇咁着數嘅。呢樣嘢而家正逐漸咁樣改變緊，因為越來越多僱主開始了解，只集中請local，未必能夠完全滿足市場需要。當然呢個「保護政策」喺好多比較保守嘅僱主都仲仍然有咁樣嘅諗法，我再一次講返啦就唔係話要「白人」，而係「本土優先」，即係話喺度畢業又係local嘅話，都會傾向請咗你先嘅。
畢竟，有冇毅力同埋捱唔捱得未必係因為嗰個人選擇移民嘅理由，相信大家都好明白，唔緊要啦，睇呢啲報道當然係得啖笑，你都知道佢都係為咗釋放「某某啲訊息」嘅啫。
點都好啦，唔好灰心，明白喺搵工嘅道路上，新移民的確係會遇到艱難嘅時候。如果真係遇到有任何問題又想問嘅話，都唔需要介意，可以send個email嚟問我又或者私訊亦都可以。祝大家蛇年旗開得勝，搵到一份你自己心儀嘅工作。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
