近日，澳洲生產力委員會發表咗一份針對混合辦公模式（hybrid work）同疫情以嚟勞動生產力變化嘅研究報告，當中一個最引人關注嘅結論，就係在家工作並唔係導致澳洲生產力下跌嘅元兇（！）。呢個結果對於一直對混合辦公模式抱懷疑態度嘅人，無疑係一記溫和但清晰嘅反擊。同唔同意都好，一齊睇睇數據。
報告指出，自2020年初疫情爆發以來，澳洲勞動生產力曾出現一段異常升高嘅「泡沫期」，尤其係由2020年1月至2022年3月，數字創下歷史新高，之後開始逐步回落，到2023年6月時已經跌返去疫情前嘅水平。呢段「泡沫期」嘅結束，令唔少人將焦點放喺工作模式嘅轉變上，尤其係在家工作是否造成效率下滑。
但生產力委員會喺報告中清楚指出，雖然學界對遙距工作對生產力影響嘅研究仍然喺發展中，不過多數文獻都顯示混合辦公對生產力嘅影響係中性甚至係正面，冇證據顯示混合模式係造成生產力下跌嘅主因。換言之，疫情後轉向在家辦公，並冇拖垮整體經濟效率。
報告亦坦言，疫情期間曾經出現過完全遙距工作（remote work）嘅情況，呢種完全唔見面、唔接觸嘅工作模式，對於某啲需要高度協作、創意思維交流嘅工作，的確會構成阻力。特別係對於職場新人嚟講，少咗同前輩或者同事之間面對面互動、即場交流嘅機會，亦都可能會減慢佢哋學習進度，影響技能成長。不過，報告亦同時指出，呢啲好處並唔需要「五日都返工」先至有，部份時間返公司、部份時間在家嘅安排，已經足夠保留住互動同成長所需嘅社交元素。
更加值得注意嘅係，報告引述咗其他學術研究，指出混合辦公其實帶嚟咗唔少隱形好處，包括員工對工作更滿意、病假同中斷次數減少、專注力提升，同時產出數量同創新程度都有所增強。更進一步，混合模式仲打破咗地理限制，令企業可以招募到原本因為地區遙遠而無法加入勞動市場嘅人才，從而擴闊咗人力資源範圍。
從整體層面睇，呢份報告其實為澳洲而家主流嘅混合辦公政策，提供咗一個理性而且數據上嘅支持。根據澳洲人力資源協會早前調查，有接近一半（44%）嘅僱主而家要求員工每星期返公司三至五日，顯示出企業對混合辦公有一定接受程度。不過，同一時間，亦有唔少大公司如 Amazon 同 Tabcorp 開始實施更嚴格嘅「返辦公室政策」，反映返辦公室似乎成為某啲行業或者管理層眼中恢復生產力嘅「萬能Key」。
Robert Half 所做嘅調查就指出，有39%企業打算喺今年內全面恢復辦公室工作。更有趣嘅係，有84%受訪公司承認佢哋嘅工作安排受其他企業做法影響，換句話講，有唔少公司未必真係有數據支持返辦公室，而係出於「其他人都返晒，我唔返會唔會輸蝕」嘅心理。
講到底，疫情改變咗唔少人對工作空間、生活節奏、以至職場關係嘅想法。混合辦公模式唔再只係一種權宜之計，而係一種新常態。今次生產力委員會嘅報告，等於係對呢個新常態投下咗一張信任票：混合工作模式唔單止唔會拖低效率，仲可能為企業帶嚟更具彈性、更多元化嘅未來。
或許，最終嘅關鍵唔係返唔返公司，而係企業點樣設計一個合乎實際、有利合作、又兼顧員工需要嘅制度。畢竟，工作本身就唔係「喺邊度做」，而係「點樣做好」。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
