呢個題目就講嘅時候要好小心，因為會敏感之餘亦都好想大家留意。喺職場係有機會會出現上述兩個情況嘅，今日同大家分享這一個題目係因為接連喺公司都發生咗唔同嘅事件，令到我認為有需要同大家做啲講解，大家喺工作嘅時候格外小心。
先同大家去講一講性騷擾，首先唔好以為係需要Physically做咗任何事，你有可能只係講咗兩句唔合宜嘅說話令到聽嗰個人唔舒服，就已經有機會中招。每個人都有權利在擁有安全且沒有性騷擾的工作場所。Fairwork所定義嘅性騷擾是：向被騷擾者提出不受歡迎的性挑逗或性好處；請求與被騷擾者相關的其他不受歡迎的性行為。
要構成性騷擾，必須合理地預期被騷擾者有可能因該行為而被冒犯、羞辱或感到被恐嚇。這意味著行為是否屬於性騷擾取決於一個理性的人在這種情況下如何解釋行為。大家要留意嘅係，在確定某些行為是否屬於性騷擾時，被指控的騷擾者的意圖並不重要。去呢個位你可能會話老細好深喎，即係點呀。等我俾個簡單例子大家，去明白其實乜嘢係為之性騷擾。仲有喎，性騷擾不必重複或持續，這可能是一次性事件。
喺八、九十年代嘅時候，於一啲比較男性主導嘅工場，可能會有一啲性感女郎月曆，今時今日就有機會構成性騷擾喇；另外如果作出咗一啲冒犯性嘅評語，例如喺派工衣嘅時候，有人無意咁樣講咗一句「啲女生係咪會收到短裙仔」，唔使一定係有女生聽到㗎，就算有男性聽到，而佢覺得呢句說話係會冒犯咗在場嘅女性，都可以作出投訴；於一啲比較敏感嘅職業例如幼教，不正當咁樣去撫摸小朋友，亦都足以構成性騷擾。
大家唔好以為呢啲講笑咁講，正如我開頭同大家分享，喺我嘅職業生涯裏面，面對過性騷擾個案雖然唔算好多，同時間係睇到有啲個案係可以避免嘅，例如喺一啲說話上面嘅無心之失，又或者係一啲對文化嘅誤解所作出嘅言語或行為。亦都曾經係處理過需要轉介執法人員嘅嚴重個案，而呢啲個案當然亦都唔係任何人想見到嘅。
而歧視方面其實都係大同小異，若然你作出嘅言語或行為係對一個群體、宗教、種族、性別、年齡等等構成冒犯或令到佢哋感到不安，便有機會中招。又俾個例子大家啦，若然你發現同事喺度推緊啲重物，你可以話「等我幫你」，如果你話「阿伯睇你都冇乜力㗎啦，等我推啦」，呢句呢就有機會構成年齡歧視。
相信大家都好清楚呢兩樣錯誤嘅前因後果，咁做僱主同埋做僱員，喺呢件事上邊有需要留意啲乜嘢呢？對僱主嚟講，無論你嘅公司係大中細，喺上述兩件事情上邊都必須要有好清晰嘅指引，包括係公司於呢兩件事上面嘅立場同埋法規。喺入職嘅時候，同事必須要閱讀或者理解有關嘅法規，否則有起事上嚟，僱主係需要負責，亦都有機會會引來懲處，例如罰款，甚至監禁。Fairwork與呢方面係有足夠嘅指引去引導僱主向員工發出適當嘅文件，而僱主亦有責任去向員工提供有關嘅文件。
員工方面，除咗你要避免犯下上述嘅行為之外，亦都需要喺入職嘅時候了解僱主喺呢啲事情上邊嘅立場同埋會採取嘅措施。畢竟防止歧視及性騷擾係雙方面嘅責任，並唔會話淨係僱主或者淨係僱員需要為着呢啲事情去負責。
今次呢個話題都幾嚴肅，下個禮拜我哋輕鬆一下，睇吓職場上邊唔同老闆會為公司帶嚟啲乜嘢嘅火花。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
