上兩日收到一封email，講到某個行業嘅工資走勢同招聘趨勢。猛然醒起，原來自己已經有兩個月冇睇過失業率數據，於是走咗去統計處望一望九月份嘅資料。果然不出所料，經季度調整後，失業率已經升到4.5%，同我預期差唔多。今日唔係想講失業率本身，而係話說我八卦，順手download咗過去十五年、按季度計嘅新增職位數據，做咗個簡單嘅走勢統計。結果睇落去，確實令人憂慮。
首先，喺數學上，一定要攞走2020年嘅數據，因為疫情期間嘅大上大落太極端，會令整體走勢出現偏差。排除咗嗰啲動輒幾百個百分點嘅波動之後，我用Excel內置嘅走勢分析工具，分行業逐個睇，竟然發現一個幾一致嘅現象：幾乎所有行業，喺過去十五年入面嘅新增職位，都係呈現下跌趨勢。
呢個現象你可以有唔同嘅解讀方式。第一個可能性係科技發展太快，令好多工序自動化，唔再需要人手操作，職位自然減少。呢個講法當然合理。同時間，人工智能愈嚟愈普及，有啲工種會被拆散成多個細項，由唔同人各自負責一部分。結果係整體人手需求減少，但每個人嘅實際工作量卻反而增加。
以人事部為例，以前新人入職，要填一大堆表格，再寄出或交稅局，依家電腦系統一次過幫你搞掂，方便得多。表面睇係節省咗一個人手，但事實上，當新員工自己上系統輸入資料時，你反而要多咗一個步驟：檢查佢輸入啱唔啱。以前呢啲工作唔關你事，依家卻落咗喺你手上。
可見，科技嘅發達，確實令新增職位減少；但另一邊廂，澳洲企業喺過去五年入面，收入雖然上升咗接近15%，人力成本卻暴增超過24%。你係老闆會點諗？成本咁高，當然傾向每個人做多啲，能夠唔請就唔請，免得多個人多雙筷，令條數更加難計。學唐唐話齋，真係「計唔掂條數」。
值得留意嘅係，喺眾多行業之中，只有一個呈現上升趨勢——公共行政同安全（Public Administration and Safety），即係公營機構。換句話講，而家喺澳洲支撐住失業率冇急升嘅，很可能係公營機構開出嘅職位，背後其實係納稅人嘅錢。呢個趨勢如果繼續下去，代表私人市場慢慢萎縮，而公共開支就會不斷膨脹。問題係：錢從何來？如果私人市場縮水，納稅基礎越來越窄，呢條數最終都唔會長久。
再睇返人口結構，過去十五年澳洲人口持續增長，工作人口參與率又冇太大變化，點解職位反而開少咗？除咗自動化之外，另一個唔可以忽略嘅原因，就係自僱人士增加。佢哋有啲可能係Uber司機、外賣員等等，收入雖然不穩定，但畢竟都叫做係份工，就會計入「在職人士」當中，卻唔會當係新增職位統計。呢個群體嘅出現，令就業市場變得更加難以量度。
總括而言，縱使變數眾多，大方向其實冇變：現代人以為科技令工作更輕鬆，但事實係職位不斷萎縮，而每個人嘅工作量卻悄悄增加。呢組數據睇落令人有啲沮喪。不過，科技唔會倒退，只會繼續向前。唯有學識接受同擁抱新科技，先至有可能喺新時代之下繼續生存。
作者：Sydney HR 的日與夜
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
