最近ADP Research發表《People at Work 2026》報告，訪問全球36個市場超過39,000名員工，當中澳洲嘅結果相當耐人尋味。只有四分之一澳洲打工仔相信自己嘅工作未來唔會被淘汰，雖然高於全球平均22%及亞太區平均18%，不過，換句話講，每四個澳洲打工仔，仍然有三個對自己嘅長遠工作保障冇信心。澳洲雖然比全球同亞太區略為樂觀，但整體反映出，大部分打工仔仍然對未來充滿憂慮。
咁究竟大家驚啲乜？如果翻查澳洲政府最新公布嘅就業數據，好似又唔多對口。澳洲失業率仍然維持喺4.4%，就業人口接近一千五百萬，整體勞工市場依然相當穩健。另外，政府早前一份有關AI對就業市場影響嘅研究（見前文）指出，截至目前為止，並冇證據顯示AI已經導致澳洲出現大規模失業。自ChatGPT於2022年底面世之後，20至24歲年輕人嘅就業增長速度，甚至略高於25歲以上人士。
問題嚟喇，究竟係政府數據錯，定係打工仔過分悲觀？或者，兩者都冇錯，因為政府睇緊嘅係今日，而員工擔心嘅係明日。
今日公司可能仲請緊人，但冇人知道三年後會唔會仲需要同一批人；今日AI可能仲只係幫你整理文件、寫會議紀錄，但一年之後，佢可能已經可以完成你一半以上嘅日常工作。唔信？問下自己，12個月前，你係咪都用緊同一個方式做嘢？所以，真正令人焦慮嘅，從來唔係今日會唔會收到裁員信，而係有一日突然發現，原來自己最值錢嗰套技能，已經唔再值錢。
呢種恐懼，比真正失業更加可怕。
因為失業係一件已經發生嘅事，可以諗辦法解決；但對未來充滿疑慮，卻會令人長時間處於焦慮狀態。對，psychosocial 又中。你會開始懷疑自己值唔值得繼續留低、值唔值得再投資自己，甚至懷疑自己仲有冇競爭力。當一個人每日都活喺呢種心理狀態，工作投入自然會下降，學習動力亦會慢慢流失。
ADP今次嘅研究其實亦印證咗呢一點。覺得自己工作有保障嘅員工，留任意願高出兩倍，工作投入程度高出六倍，自認生產力高嘅比例更高出3.3倍。好多管理層可能會以為，員工投入度來自人工、福利或者升職機會，但研究反映出另一件事：如果員工連自己仲有冇未來都唔知道，再好嘅福利，都未必能夠真正留得住人。
即係話，只係諉過AI，未必真係企業要面對嘅問題；管理層嘅沉默，先至係重點。近兩年，好多企業高層講AI、講數碼轉型、講提升效率，甚至講減省人手成本，但好少聽到有人認真同員工講：「AI會改變你邊部分工作？公司希望你學識乜嘢新技能？三年後，你仲可以喺公司發展成點？」如果企業自己都講唔清楚未來方向，員工自然只能夠靠新聞、社交媒體同自己嘅想像去拼湊答案。而想像，往往比現實更加恐怖。
之前已經不斷討論，AI真正改變嘅未必係「份工有幾穩陣」，而係「以後份工點樣做」。AI已經可以處理重複性高、程序化、容易標準化嘅工作；但涉及判斷、建立信任、帶領團隊、跨部門協作、創意思考、解決衝突、管理人才等工作，依然需要由人完成。AI可以協助人，但至少現階段，仲未能夠取代一個真正有經驗、有判斷力、有責任感嘅專業人士。
呢個亦係我一直同企業分享嘅觀點：未來最有競爭力嘅人，未必係最識用AI嗰位，而係最識得將AI融入自己工作流程，同時不斷提升自己不可取代能力嗰位。
企業需要坦白同員工溝通未來方向，需要持續投資技能培訓，需要令員工知道，公司唔係想用AI取代佢，而係希望利用AI令每一個人做得更有價值，甚至創造新嘅價值。當員工知道自己有機會成長、有機會轉型、有機會掌握新技能，佢哋面對AI時，感受到嘅就唔再係恐懼，而係機會。
歷史話畀我哋知，每一次工業革命都曾經令人擔心大量工作會消失。但最後被淘汰嘅，往往唔係人，而係舊有嘅工作模式。因此，真正決定一個人會唔會被淘汰，從來都唔係AI，而係自己有冇能力跟住時代一齊成長。
同樣，真正決定一間企業能唔能夠留住人才，亦未必係人工高低，而係當科技快速改變世界嘅時候，企業有冇能力俾員工一份信心，令佢知道自己唔係一件隨時可以被替換嘅工具，而係公司未來發展不可或缺嘅一部分。
人，仍然係企業最重要嘅核心。
