就業數字同失業率不嬲都滯後一個月嘅，而家已經去到五月尾，係時候睇一睇四月份嘅數字。之前已經同大家講過，預期嘅失業率去到年尾應該起碼上升至4.1% ，語音未落，四月嘅失業率，調整後已經去到4%，照咁睇嘅話，有機會去到年中左右（即係六月），已經會達到4.1%甚至超過。
失業率上升，同時間平均工時亦都上升，除咗因為公司可能少咗人之外，另外就係喺蓋嘅復活假期請假嘅人數多咗，令到其他嘅員工需要增加工時去填補放假嘅同事所失去嘅工時。而呢個Pattern係同喺疫情之前相近，代表澳洲已經逐漸走出被疫情影響嘅時期，逐步復常。
隨着澳洲經濟活動開始放緩，預期勞動人口將會繼續下調，即係話失業率有機會繼續攀升。另外亦都由於有更加多嘅人需要搵工，工資增幅亦都會因此而放緩，相對疫情後嘅一兩年嗰種employee Market，將會逐漸移返到對僱主比較有利嘅情況，新招聘嘅僱員工資，有機會比起過去兩年所招聘嘅為低；另外之前亦都已經提過，澳洲政府將會修改移民政策，新移民將會以高技術專業人士為主，為咗能夠得到工作經驗，好多喺工資上邊都會願意去compromise，衝擊本地就業市場。
勞動市場開始收縮，但係生活成本卻繼續攀升，令到市民對於呢使錢變得更為審慎。分析師已經指出，市民洗少咗錢，變得更謹慎，會令到零售行業受到直接影響，包括喺招聘上面更為審慎，開始扣減員工嘅工時，甚至提早關門等等。
然而，打工仔嘅睇法就有啲唔一樣。
根據一項最近嘅人力資源調查報告，僱主同埋僱員無論係工資、工作待遇等等嘅範疇上邊持有兩極嘅意見。工資就唔使講㗎啦，當然僱員希望得到的工資梗係同僱主希望付出嘅係有相當嘅距離啦，咁待遇方面又點樣呢？先講在家工作，普遍僱主會同意容許員工在家工作，只不過就唔好日日啦，大部份僱主表示，希望員工在家工作日子維持喺一至兩日就夠，然而僱員當然希望更多啦，甚至有超過六成嘅受訪者表示，若然僱主更改在家工作嘅日數，佢哋係會搵過另外一份工。可惜嘅係以而家嘅就業市場狀況，在家工作嘅日數勢必會逐漸扣減，呢方面大家喺搵工嘅時候需要留意。
另外一個都幾值得大家留意嘅調查結果係，喺後疫情時代，現時全球大約有四成左右嘅人表示如果更改現時嘅工作模式，例如升遷又或者係被給予更加多嘅工作責任，佢哋係會考慮轉工。喺澳洲，呢條問題係有超過六成嘅受訪者選擇轉工，遠超於全球平均水平。分析指呢個心態係會直接削弱澳洲嘅競爭能力，可惜嘅係呢個似乎係一個general嘅澳洲打工仔意識形態，隨着有更多新移民嘅湧入，而且大部份都係亞洲移民，勢必對上述嘅文化帶嚟衝擊，這個我哋可以另外再談。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
