好多時候打工我哋都會覺得自己只係小薯仔一名，喺公司裏面冇乜影響力，可能你有冇出現都未必有人知。最近有一位同事就快榮休，每一次我搵佢傾偈，佢都硬係話自己人工又低又係公司底層，唔使同佢搞啲咩榮休嘅大龍鳳，直接過水俾佢，然後講拜拜就最理想。
佢其實係公司裏便專門負責做Inventory control嘅，話多唔多話少唔少，淨係配件都六千幾七千件，有大有細放滿晒成個Warehouse。最大鑊嘅係啲parts有啲個樣差唔多，只不過可能係裏便摩打嘅速度有少少唔同，就已經完全係第二樣嘢。一陣間你搵錯咗送錯咗，由於我哋嘅係全國性服務，分分鐘個技術人員去到顧客屋企，先至發現原來配件錯誤，需要走人下次嚟過，咁就真係費事失事，兼且浪費人力資源了。
另外同事仲要熟習系統，識得點樣喺系統當中搵到配件，甚至乎需要記低用咗啲乜嘢，又要喺個Warehouse度走來走去搬搬抬抬，我只不過企咗喺度聽佢講半個鐘我都已經一額汗，因為阿大哥佢榮休之後，要搵過另外一個人做到佢而家識做嘅嘢，真係非常困難。困難位並唔係在於冇人做，而係要能夠短時間咁樣去pick up到佢做緊嘅嘢又唔會出錯喎，呢個簡直係9.9分啦。另外佢而家逗緊嗰份糧，咁鬼奀，起碼要俾多3、40%先至請到一個新嘅人返嚟。
我同佢講，你咁都話俾我知你係小薯仔，一個唔覺意你有咩冬瓜豆腐，真係唔知喺邊度搵個人能夠學識到你啲嘢或者知道你做緊乜嘢。其實，喺一間公司，每一個人嘅工作都係獨特嘅，你做到嘅嘢人哋未必做到，人哋做到嘅嘢你又未必做到，所以又唔需要太過妄自菲薄，認為你喺公司都只係小職員一名，我哋成日都話，公司就好似一台機器，而員工就係部件，好多時候缺一不可。因此點解人事部有陣時咁閉翳，就係老闆同你講話叫其他同事每人都做住啲先，人哋明明唔係嗰個部件，你又夾硬要人哋做埋一份，久而久之你部機器根本頂唔順，最後就散鬼咗與人無由。
雖然個現實係冇話冇咗邊個唔得，同時間要搵人頂你個位你都要俾啲時間人事部請人㗎，所以對於人事嚟講，請你返嚟唔係為咗炒你㗎，咪以為個個老闆都係變態嘢先得㗎，你估train你唔使錢咩。
先旨聲明，喺度唔係為老闆又或者員工講嘢，我想講嘅係呢個由頭到尾都係一個互動，互相依賴嘅一個關係。你信得過你老闆會出糧俾你同時間你老闆亦都相信你能夠把工作做好，唯有喺呢一個互相信任嘅大前提，公司先有得發展㗎。任何一方面經常喺度嘰嘰趷趷，到最後分分鐘一事無成，戇居兼無謂。
今日冇乜資訊性，只係想講各位老闆， respect your Staff，各位打工仔，努力去展現你自己嘅價值，咁間公司先至會穩定發展，功德無量。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
