承蒙performance education （PE）以及Study NSW嘅邀請，上星期四到了新南威爾斯大學參與一場就業講座，成為五位panelist的其中之一，主要是探討有關在職場上如何面對文化衝擊、有效溝通以及面對未來科技發展應注意的事情。講座對象為海外留學生，喺上面望落去，的確有好多亞洲面孔，不足為奇吧。
事緣係公司受邀請去參與呢個嘅座談會，老細二話不說就send咗個email俾我叫我參加，冇所謂啦，又唔係未講過，於是答應了。
咁當日唔同嘅講者都來頭不少，有做了很多年培訓經驗的酒店界人士、亦都有著名求職網站嘅經理以及專門負責executive Coaching嘅人士，望左望右，睇嚟我應該係資歷最低嗰個。
整個過程其實有啲趕，每人嘅發言時間都比較短，我都只係能夠僅僅分享咗喺澳洲做嘢同埋喺香港做嘢嘅文化差距，跟住就已經要比下一個。反而係完咗之後嘅open discussion，去返屬於自己嗰張枱，就有好多人走嚟問嘢。可能物以類聚吧，其實見到好多香港人，因為個樣又似、個姓又似、同埋一出聲就聽得出。
問題來來回回都係問點樣寫履歷、或者見工嘅時候有咩要注意、有咩問題可以問等等，雖然我之前已經喺頻道裏邊大概講過應該點樣見工，似乎呢類型應該點樣問問題同埋有咩嘅態度啊？或者係要留意嘅地方都仲有空間同大家再次分享，因為真係幾多人問。
呢類型嘅講座冇錢袋，都係幫公司做吓呢啲叫做Community Service，履行返企業公民責任。同時間我又睇到，呢類型嘅講座其實市場都幾大，因為好多學生喺面對搵工同埋見工，真係冇乜經驗，而有相關行業歷練嘅人同佢哋分享經驗更加少。所以我覺得今次呢一個嘅座談會係好有意義，好值得參與。
嚟緊如果再有機會參與呢類型嘅講座嘅話，各位同學請踴躍參與，唔好錯過可以見到唔同行業嘅人士嘅機會。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
