千呼萬喚嘅雪梨香港人市集終於喺昨日圓滿舉行！雖然係long weekend，但係我哋睇見嘅只係人山人海，people mountain people sea，有啲店舖長期三、四十人排隊等食，亦都有商家決定玩吓掟彩虹，全場high爆歡樂之聲不絕。
今次嘅市集由OzStarter舉辦，目的係為咗能夠讓香港嘅商家有一個平台去展示自己嘅商品，推廣佢哋嘅產品。OzStarter係一個非牟利團體，獨資舉辦呢次嘅活動。是次活動得到Willoughby Council大力支持，納入其Emerge Festival活動其中一個環節，並協助宣傳，特此鳴謝。
大會希望透過這次活動向澳洲唔同嘅種族展現香港人嘅獨特文化以及多元性，向澳洲其他種族推廣並宣傳香港文化，同時間藉此機會連絡香港嘅商家，彼此扶持，展現香港人嘅合作精神，同步共創海闊天空嘅將來。
講返市集有咩玩啦 ！除咗有好好味嘅篤篤魚蛋同燒賣，亦都有雲吞麵、中西式點心、雞蛋仔、奶茶等等。大家想唔想知道生意有幾誇張先？一開始講有啲檔口長期3、40人排隊，另外有啲檔口要提早收檔，因為已經冇嘢賣；亦有檔口表示要返去補貨、其中一間賣檸檬茶嘅舖頭，開咗唔夠個零鐘已經全部賣晒！認真犀飛利。
今次我哋亦都有一個攤位係放咗好多7、80年代嘅玩具同board game俾大家參觀，例如有《挑戰九七》、波子棋、康樂棋等等，開頭我以為唔會有好多人睇，點知成場非常之多朋友仔喺嗰個攤位度參觀影相，甚至詢問展品是否出售，也出乎意料之外。
除此以外，今次亦都有好多唔同嘅表演，主辦方希望盡量盡力做到多元性，因此安排居澳第二代嘅小朋友跳舞、亦都安排一位穿著非常獨特嘅女士教大家點樣車衣，佢件衫佈滿住香港地名， 十分獨特。當然亦都唔少得有唔同嘅歌舞表演同抽獎活動。整個活動最尾有一對樂隊表演了10多首歌曲，最後大家意猶未盡大叫encore，他們想了一想，選擇了Beyond的《海闊天空》，在場有非常多朋友仔唔單止一齊唱，更用手機開着電筒，呢個場景，似曾相識，卻恍如隔世。
正如大會所說，希望參與嘅朋友大家都開開心心，最緊要係能夠藉此凝聚港人，團結一致。作為大會嘅司儀，我睇見咁多香港人俾我哋團隊嘅鼓勵說話，實在令我哋非常感動。我亦都有我嘅家人、朋友、弟兄姊妹們甚至我嘅讀者都來支持捧場，也令我十分感動，在此向大家再一次致謝。
有第一次就一定有第二次，香港人，加油！
作者：Sydney HR 的日與夜關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
