上個禮拜出席咗一個大學嘅論壇，內容係關於未來職場所需要嘅工作技能。雖然講埋講埋都係啲老掉牙嘅理由，既然係由業界嘅專業人士出手講（出口），點都要同大家一齊分享吓嘅。
基礎上兩個鐘頭嘅研討會，俾到大家嘅訊息就係人工智能將會取代好多唔同嘅工種（廢話），同時間，僱主對僱員嘅要求亦都產生咗變化。基礎上就係需要一班能夠validate到人工智能所產出嘅報告又或者係產品，同埋由於未來世界好多事情已經係人工智能可以處理，人與人之間嘅互動同埋溝通技巧就變得非常重要（繼續廢話）。
既然係咁嘅話，年青一代面對未來新職場嘅挑戰，有咩係需要準備又或者了解嘅呢？首先我哋講緊嘅就係source of truth。新一代，似乎大部份嘅嘢都係能夠喺互聯網嗰度得到，問題係當中所取得嘅資料係咪真實同埋正確嘅呢？呢一啲就並唔係只係靠做desktop research可以得返嚟，好多時候係需要經驗同埋歷練。喺呢個時候能夠搵啱一個師傅就變得好重要。而家好多嘅知識同技術面臨失傳，原因就正正係因為新一代過分倚賴互聯網取得知識，而唔係親自落手落腳去嘗試。而呢一個我哋就係講緊職場互動，新一代需要好似海綿一樣去將師傅嘅知識吸收，尤其是一啲技術層面嘅學習，又或者一啲經過歲月先至能夠下到嘅決策等等，因為當中嘅考量並非人工智能（至少而家唔得），同埋自動化係可以取替嘅。
跟住呢就到validation。響大互聯網時代，頭先都睇到，好多時候Internet就係嗰個source of truth。問題係演算法下，呢個並不成立。例如某啲嘅歷史，又或者係學說等等，都有可能喺大會互聯網時代喺眾多嘅數據下被扭曲甚至被混淆。之前已經同大家分享過，當我去寫文章做research嘅時候，ChatGPT錯誤地將兩位心理學家嘅實驗混為一談，幸好因為我曾經喺教科書度睇過呢兩位心理學家嘅實驗，我先能夠知道ChatGPT出錯。唔係去話俾人知我有幾犀利，重點係，我哋唔能夠將互聯網嘅資訊當為百分百真理而唔去核實，而呢一個亦都係新一代需要面對考驗，就係你要盲目地跟從互聯網提供嘅資訊，定係你會嘗試返對書本當中去尋索真理呢？唔好話我old school，呢個係第一手嘅經驗，令到我對新一代拓取資訊嘅方法表達憂慮。
未來世界，人類如果繼續不思進取，過分倚賴人工智能同埋機器，被取代及淘汰，有可能係自作孽。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
