隨住澳洲聯邦大選臨近，政治話題喺各大職場愈講愈熱烈，大部分員工都樂於參與討論。根據 Robert Half 最新調查，超過八成（88%）嘅澳洲員工話，佢哋會同同事傾政治議題；另外有55%表示，喺職場討論政治事件感到自在，只有13%覺得唔舒服，而有20%持中立態度。
報告亦指出，有41%嘅僱主留意到，員工喺辦公室時不時都會傾政治話題，其中亦有41%嘅僱主認為呢啲討論對團隊氛圍有正面影響；48%認為影響唔大，只有11%覺得有負面影響。即使喺未出現政治討論嘅職場，亦有大多數（61%）僱主認為，即使有，都唔會影響團隊動態，只有26%擔心會有負面影響。總括而言，澳洲僱主普遍對政治對話持開放態度，甚至覺得有助促進團隊互動。
雖然員工對政治話題愈嚟愈開放，但大家討論時都要保持尊重同謹慎，畢竟政治始終係一個容易引發情緒高漲嘅議題。因此，管理層要保持警覺，確保所有員工都感受到被尊重同包容，無論政治立場如何。只要公司建立一個「互相尊重」（Mutual Respect）嘅文化，就可以有效管理可能出現嘅不適或敵意互動。
以我哋公司為例，因為文化背景多元，唔止政治，連文化議題都成日傾好耐。講返今次大選，好多同事都會走嚟問我應該投邊個票，當然喇，我喺討論時會盡量保持中立，就算自己心入面有心水候選人，都會用一個比較持平嘅態度去分享，將唔同政黨嘅優點同缺點都擺出嚟傾，希望大家最後都可以自己做判斷，選出一個真正代表自己聲音嘅議員。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
