本欄上一篇提到，澳洲可能係全球勞工法例最複雜嘅地方，我諗我咁講一啲都唔誇張。近兩年有好多香港人一係就回流，一係就移民過嚟澳洲又或者選擇嚟到讀書，好多都會嘗試搵工，讀書嘅就梗係搵兼職做啦，佢哋好多都發現原來喺澳洲打工，唔同行業，所面對嘅法例都不一樣。就算係人工，唔同行業亦都唔相同。香港嘅最低工資係劃一嘅，澳洲呢，係按行業嘅，淨係呢樣嘢都已經搞到一班香港人會覺得「阿媽，我好亂呀」。
唔單止咁喎，澳洲嘅勞工法例係非常偏向僱員，對於僱員權益係有非常嚴格嘅保障。例如法例規定，你辭職嘅話，七日內應該要收到你最後嗰份人工（Fairwork Act 2009 (Cth) ）。當然，未必個個僱主都能夠做到，咁有啲員工都會隻眼開隻眼閉嘅，若然大家因為擘面而離職嘅話，員工就會計得好緊，若然公司／舊公司有咩行差踏錯就會訴諸法律。
一講到訴諸法律，就一定要提吓呢度嘅仲裁機構 Fairwork Ombudsman （公平工作調查專員署），係解決工作場所糾紛的地方，所有投訴一般來講都希望能夠透過協商和解，避免問題升級。若然無法和解嘅話就會進行聆訊作出仲裁。Fairwork 不一定有法律權力責承雙方必須執行其建議，但若然雙方同意執行而其中一方反口嘅話，就有可能會升格到法庭，到時候雙方必須根據裁判結果去執行。我哋可以喺日後再同大家分享，從此可見，喺澳洲做人事部，就需要處理上述嘅事件。Fairwork本身已經好複雜，足夠用幾次嘅專欄去討論。
另外，WHS（Work Health and Safety）都屬於人事嘅範疇，即係話同事喺工作上有咩冬瓜豆腐受傷，都係人事部處理。
由於澳洲「百物騰貴」，好多公司都可能只係得一個半個人事部職員，而佢要處理成公司百幾二百人。好彩嗰啲就唔使處理出糧，如果唔係，出糧都回歸埋俾人事部做。因此喺澳洲做人士真係百足咁多爪，基礎上咩都要識。問題係，邊學得咁多呀！所以澳洲亦都有非常之多嘅 HR Consultation Firm，專門負責協助企業去處理一啲可能係「一次性」嘅人事項目，例如撰寫合同、設立公司規章等等。
咁你而家知道人事部有幾忙啦！唔好以為我哋淨係識得請人同炒人，好多時候我哋都係十個煲九個蓋，做到攤攤腰。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
