如果你有抑鬱症，我希望同你講 — 我100%相信你已經好努力地吸氣、換氣、生存，而你有日係可以搵到屬於你嘅平衡。
第一次食藥係大約十年前。斷斷續續食藥、又嘔又暈於是停藥、夾硬撐、逃避、再試藥、返去睇醫生、再逃避、傷害自己、入院、再食藥等等等等來回最少五年。
後來幾年，以 one step forward, two steps back 嘅步速苟延殘喘。再後來，雖然仲會「發作」，但慢慢由日日發作變做幾日一次，再由幾日一次變做一星期一次⋯再開始抖到氣，開始會自覺調節反應，開始識得喺爆發前停一停，開始留意到身體同心理點樣互相影響，再開始練習「念起即覺」。
一直到有日發現，原來自己平衡返，主導返自己節奏，唔洗再食藥，好返。
雖然呢幾年嘅工作、鎮壓、通緝高壓，但比起以前，我更識得呼吸。
我感恩曾經患上抑鬱，曾經有過一座自己深信無法跨過嘅大鐵壁，曾經有過一股每分每秒都用力蓋過我嘅黑暗，所有令今日嘅我更理解他人痛苦、更會照顧自己、更能盛載力量、更感受到生命。
今日見到6年前同朋友剖白經歷嘅post。當時我想面對恥辱，亦想安撫他人。於是諗起呢刻面對緊呢座山嘅人。
掙扎緊嘅你，如果你唔相信自己做到，我相信你可以：你可以慢慢搵到自己嘅平衡，慢慢搵到自己嘅步速，慢慢搵到自己嘅意義。
你並唔孤單，一齊慢慢加油。
作者：郭鳳儀
