第一篇講吓適應先。
啱啱落地嗰下梗係有好多嘢會唔慣㗎啦，不論係你以前嚟過旅遊過，定係好似我咁樣，從來都未嚟過澳洲直接膽粗粗落地就係攞PR；衣食住行樣樣嘢你都要適應，亦都會面對好多焦慮同不安 — 老實講可能你連點樣報警你都未必知。過嚟之前你可能會預想呢邊嘅生活有幾美好。但係一落地你就會遇到好多即時嘅困難，例如：點樣搭車？點樣買餸？方位係邊度？點樣求助？一個人嘅話就真係得部電話你可以找答案或幫手。
有同伴嘅話好嘅話可能係有個照應；難講嘅，唔知嗰個係咪一個好嘅隊友。喺適應嘅中間唔同人面對環境嘅轉變同埋難關嘅時候都會有唔同嘅反應。有人會覺得好刺激好enjoy，但目測九成嘅人都有唔同程度嘅焦慮。除咗正常環境轉變出現嘅焦慮之外，如果本身就已經對移居外地有好大懷疑，或者底個一層係冇乜決心嘅話，好快會表現出厭惡嘅情緒，覺得「一早都話唔走好過㗎啦」，更大嘅可能係因為期望同現實出現落差而好唔開心。注意，有時候，情緒同表像係會唔同 — 忟憎易怒，底個浸可以係抑鬱焦慮㗎。
如果你係有同伴嘅話，最希望係大家可以互相扶持。啱啱適應期，大家對未來嘅設想可能有唔同嘅時候，或者面對難關嘅時候，就會有好多討論，甚至鬧交嘅出現…
一般嚟講適應期就好似陣痛咁樣，過咗頭嗰排就會好啲。好多人都會問我：你用咗幾耐嘅時間嚟適應啊？我會話個人嚟講，最開頭嗰個零兩個月真係要俾啲注意力，去放開心，接受有啲乜嘢係同以前係唔同，提醒自己唔好成日諗住前面嗰一套。但係講「真.適應」成個國家嘅文化、政治、或者社會生態上，我會話我到兩年半後嘅今時今日都繼續適應緊。你會發現始終你唔喺呢度出世，呢度成長，同你一向生活嘅環境有好大分別嘅時候，努力去融入當地所使出嘅呢一份努力，就係所謂嘅努力去適應囉。有壓力但又會有進步，至少我到今日都好喜歡我移居呢一個決定。冀望過去，現在，同未來移居適應中嘅你，都可以喺適應嘅壓力中找到你嘅樂趣同新奇發現。
—
細粒姑娘instagram：https://www.instagram.com/littlepsynurseaus/
2024嘅細粒姑挑戰新corner!
細粒姑娘嘅隨筆噏
精神唔再係講病，而係點樣達至精神健康
每一期，兩個字做標題
可以係某一個階段
可以係某一個徵狀
希望可以及時補充你嘅能量
繼續喺異地撐住你嘅香港人生
