黃耀明（明哥）的《邊走邊唱》巡迴演唱會最近宣布在澳洲墨爾本和悉尼開騷，明哥過去一年名副其實邊走邊唱，由台灣到北美再到英國歐洲，經過一年多時間後，今次走到地球南端的澳洲，之後他將再回到台北原點。《邊走邊唱》差不多繞了地球一圈，明哥表示過程「既有趣亦非常吊詭」，只因近年香港發生的事，導致大量香港人的四處遷徙，令一些他本來沒機會去開演唱會的地方，如今因多了流散各地的香港人，反而有更多的演唱空間。明哥感慨說：「有趣地方係，我係一個香港孕育出嚟嘅歌手，但係過去幾年我喺香港都冇得演出，如今世界各地多咗好多香港人，好多我以前無諗過去嘅地方，反而多咗機會演出，所以究竟係失去咗定係賺多咗，呢條數真係未知。而家呢一刻都係希望捉緊啲機會去見大家，同去一啲未去過嘅地方。其實我每去到一個地方，都會設計一啲環節或者歌曲，喺過程中，都會加深咗對當地文化背景嘅認識，我覺得無論如何都係一種得著！」
努力尋找演出機會及場地
明哥的《邊走邊唱》巡迴演唱會本來在去年8月有機會在香港會展開唱，可惜最終在沒原因下被取消。對於巡演地點偏偏欠缺自己出生及成長的香港站，明哥至今仍感到非常可惜：「我覺得好無奈，如今社會時勢係我哋完全估唔到，我仍然覺得租場機構欠我同歌迷一個解釋」。對於再在香港開騷，明歌帶點氣餒：「我當然想再喺香港開騷啦，不過暫時容許我躺平一下先，我仍然會好努力去尋找演出機會同場地，不過喺可見嘅日子，我暫時都係會躺平下，或者去世界各地，見吓唔同嘅歌迷先囉！」
年過60的明哥轉眼已入行差不多40年，在這行業經過起起落落，面對過各種打擊，再開朗的明哥透露自己亦曾有過疑似抑鬱的症狀，明哥稱雖然現在香港的大環境好難令人感到愉悅，但幸好自己有大班好友及音樂陪伴：「我曾經提及過自己試過有好消沉嘅時候，甚至係有一啲情緒病，我覺得而家我係非常之OK嘅。我有朋友啦，亦有尋求一啲醫學上嘅幫助啦，同埋我可以繼續創作音樂同分享音樂，喺過程中會得到大量嘅快樂，我覺得音樂係一個好好治療百病嘅方法。」
保住赤子之心 對世界仍好奇
明哥熱愛音樂不用懷疑，只是入行近40年，多大的熱情也難免有冷卻的時刻，難得是明哥仍有熱情環遊世界，有心有力在地球每個角落留下歌聲。明哥熱情不減，他笑言只因自己仍對這世界好奇：「我覺得唱歌時候，無論首歌係悲傷或者係喜樂嘅歌，都會係一種釋放同宣洩，通過唱歌呢個活動係會令我開心，所以我係好想捉緊創作同推出作品嘅機會。而且我呢個人嘅性格係充滿好奇心，雖於我已經61歲，但係我仍對世界各樣事物同新嘅音樂發展充滿好奇，可能呢樣就係我令我繼續創作嘅動力啦！」抱住好奇和赤子之心，是明哥保持青春的秘方，明哥還表示多聽現場音樂和演唱會，可以令人心情快樂亦自然會心境開朗。
撐新音樂人 樂隊組合有驚喜
雖然明哥暫時沒有機會在香港公開表演，但作為樂壇前輩，當然有留意近年本地湧現兼爆紅的男女新人，明哥認為「時代那麼壞，名字那麼大」，除了時代環境因素令他們多了創作靈感之外，科技亦的確為新人們提供了便利，而現代聽歌或創作，亦比過去更加「民主」：「一個咁嘅時代，係可以俾好多靈感俾人創作音樂嘅。而家每個人都可以用自己方法去發行，唔使靠大公司，可以一手一腳搞掂， 宣傳甚至發行，都係一部電腦或者電話就得，大家除咗去緬懷所謂過去good old days 嘅Canton POP外，一啲新嘅音樂或者創作人都要去支持囉」。而在新人之中，除了林家謙，Serrini等大路選擇之外，明哥更愛留意一些新晉的樂隊組合如COPAK等，演出不時有驚喜。難得61歲的明哥仍緊貼潮流，期待他在澳洲演唱會為大家帶出更多火花。
黃耀明邊走邊唱澳洲站：
Melbourne/ 墨爾本場
日期：2024年3月14日（星期四）
時間：7pm (doors) / 8pm (Opening)
地點：Festival Hall, 300 Dudley St, West Melbourne VIC 3003
Sydney/ 悉尼場
日期：2024年3月17日（星期日）
時間：7pm (doors) / 8pm (Opening)
地點：Town Hall, 483 George St, Sydney NSW 2000
黃耀明邊走邊唱新北站
New Taipei / 新北場
日期：2024年4月5日（星期五）
時間：7pm (doors) / 8pm (Opening)
地點：ZEPP NEW TAIPEI
購票連結: https://linktr.ee/songsofwandererstour
