【人事世界】在家工作大趨勢 – Sydney HR的日與夜

FR 嘅 workforce 座談會另一個重點，就係探討在家工作（remote work）嘅現況同未來走向。

雖然呢個話題已經講過無數次，但喺今次 HR Summit 上仍然係炙手可熱。由 Australian HR Institute 出手，針對 1000 名僱主進行咗全國性調查，並發佈咗一份具代表性嘅研究報告，結果頗為值得參考。

數據顯示，有 44% 僱主要求員工每星期返公司 3 至 5 日，比 2023 年同期少咗 4%，反映僱主對在家工作安排嘅接受程度略有提升。當中，有三成僱主希望員工每星期最少返公司三日，16% 接受兩日，而接近三成僱主雖然冇明文規定，但都鼓勵員工返公司，整體趨勢上，企業仍然傾向推動員工返辦公室工作。

至於在家工作嘅「壞處」，57% 僱主認為員工之間關係變得疏離，38% 擔心影響團隊合作，另有 35% 表示難以監察員工表現。

不過，僱主同時亦承認當中有唔少「好處」：65% 認為有助推動 work-life balance，44% 認為有助提升員工留任率，約 40% 則指出可以吸引求職者並提升員工福祉（wellbeing）。喺今日大家高度重視 psychosocial hazard 嘅職場氛圍下，呢方面嘅優勢越嚟越受重視。

只有 45% 僱主認為在家工作可以提升生產力，原因可能係因為難以即時監督，又或者家中環境容易令員工分心。

當然，唔係所有工作都適合在家做，例如倉務、廠房工人等，佔咗受訪僱主當中嘅 28%。針對呢啲工種，60% 僱主表示會提供其他補償方式，例如實施更彈性嘅工時（有高達 96% 受訪者認同），部份更考慮實行四天工作週，或者調配到其他部門工作，以作補償。

總結嚟講，在家工作已經唔再係「特別福利」，而係現代職場文化不可分割嘅一部份。接下來，值得大家密切關注嘅，將會係政府年中提出嘅相關修訂法案，以及未來推行時，僱主同僱員雙方嘅實際反應。

作者：Sydney HR 的日與夜關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。

支持我們：https://points-media.com/supports/