最近喺一啲HR嘅雜誌度睇到一單幾特別嘅個案，幾值得同大家一齊分享討論。因為個個案係涉及公司嘅一啲管理法則，Policy，以及社交媒體嘅運用。呢幾樣嘢似乎都幾影響今日職場嘅運作，所以值得探討。
話說喺某一間中資嘅電器公司，喺澳洲有分行，而其中某一位嘅部門主管，每年都有參與公司嘅未來方向策劃同會議。點知公司去年改組，呢位同事亦都喺年度嘅appraisal度出現咗問題，最後被評為C grade，已經唔多happy，家陣仲要冇份開來年發展會議，就更加唔開心。
呢位仁兄於是乎就向人事投訴，話上司對佢有偏見，兼且歧視佢。經過咗一啲調查，佢嘅年度評估就由C改返做B，但依然冇份開會。呢個人於是乎老羞成怒，喺公司嘅跨國溝通社交媒體（ WeChat ），大爆公司一啲做得不恰當嘅事情，例如炒咗大肚婆呀、欺凌員工以及新資不公等等，真係搞到全世界都知。咁公司就當然執行加法，最後仲炒鬼埋佢。俾人炒咗就梗係覺得唔抵，於是乎佢就入稟Fairwork，話自己係「吹哨人」，狀告公司不合理解僱。
問題嚟啦，究竟係邊個唔啱呢？係公司？定係呢位自稱「吹哨人」嘅部門主管呢？
Whistleblower，中文譯作「吹哨人」，呢個當然係直譯啦，簡單嚟講就係告密者。通常呢類人會揭發團體或公司內部一啲非法、不道德或不正當行。呢啲行為可能涉及腐敗、欺詐、安全違規或其他形式的不當行為。告密者通常會提供相關資訊，揭露這些問題，目的是為了保護公眾或該團體本身嘅整體利益。他們可能會向公司內部管理層、外部監管機構或媒體報告，這取決於不當行為的性質和風險程度。
好喇，咁上面單嘢邊個啱呢？公司的確做咗啲違規行為，而該名「吹哨人」卻喺公司嘅社交平台群組爆大鑊，似乎旗鼓相當。Fairwork最後裁定僱員敗訴，行為不當。
Fairwork叫你句都幾簡單，就係僱員並冇遵從公司正常途徑向人士先反映，擅自喺公司溝通嘅社交平台爆料，違反合約當中嘅保密協議。你可能問公司的確違規，呢啲似乎涉及公眾（即係公司裏面其他僱員）嘅利益。喺正常情況下，一旦投訴最後被不得要領，亦冇任何改善情況甚至變本加厲嘅時候，僱員收集足夠證據後再爆料，佢敗訴嘅機會就會降低。另外一般吹哨人都會匿名，佢要喺自己公司嘅社交媒體爆大鑊，唔俾人捉住嚟揼就有鬼囉。
咁究竟當你遇到有機會要做吹哨人嘅時候，法律又對你有啲乜嘢保障呢？下星期繼續。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
