喺公司盡忠職守做好自己嘅本分，俾老細賞識，自然有機會升職加薪出人頭地。萬一有啲咩新project又或者有同事有咩冬瓜豆腐，你就可能係嗰一位拍心口兩脅插刀，頂硬上都幫老細搞掂嗰種人。照計，老細應該非常欣賞，寵愛有加。只不過呢，喺在人力資源世界中，我哋有一個Terms係叫做績效懲罰（Performance Punishment），究竟係乜東東嚟嘅呢？
績效懲罰（Performance Punishment），也稱為悄悄晉升（Quiet Promotion），是指讓高績效員工承擔額外的工作負擔，通常沒有補償或晉升。呢個概念來自於當員工表現優秀、工作效率高或完成任務超出預期時，管理層反而給他們分配更多的工作或更具挑戰性的任務，而不是給予他們適當的獎勵或認可。
聽起上嚟係咪有啲覺得熟口熟面，但係又有少少唔係好明？因為喺工作上邊做得好係應該嘅，做得快更加係bonus，咁點解會係一個懲罰呢？舉個例子啦，有同事可能喺個職位度都已經做咗幾年啦，叫做上咗手同埋平日嘅流程都幾順利。跟住就嚟咗個新同事，啱啱到步可能幾個月咁啦，一直都喺度學緊嘢。然後公司就出現咗一啲人事嘅調動，有其他部門同事離職，而嗰個位係呢兩位同事都勝任嘅。咁佢兩個都同時申請呢個職位啦，經理會點樣揀呢？要個有經驗嘅定係要張白紙呢？
要知道轉去另外一個部門薪水唔同咗做嘅嘢亦都唔同咗，經理最後就將新來嘅嗰位同事調咗去另外一個部門，原因係嗰位做咗已經幾年嘅同事走嘅話會對日常嘅Operation構成影響，同事於是就覺得係因為自己嘅工作能力比新來嘅同事強而導致佢唔能夠有機會轉去另外一個部門做嘢，而呢個操作就有機會係成為上面講嘅績效懲罰。
Performance Punishment長遠會導致幾個問題嘅產生：
員工過度勞累：同事因為做到嘢導致要持續承擔更多工作而感到壓力和疲勞。
士氣下降：同事會感覺他們的努力沒有得到應有的獎勵，反而被認為是理所當然的，這可能打擊工作積極性。
工作動力減弱：一些員工可能會故意降低表現，避免因優秀表現而承擔過多的工作量。
工作場所的績效懲罰有多種表現呈現，好多時候都唔係顯然而見嘅，高績效者經常發現自己承擔著越來越具有挑戰性的任務，但係又冇相應權力或資源。咁唔單止會對佢哋嘅表現構成壓力，畢竟呢個世界上冇包生仔，萬一滑鐵盧瀨咗嘢，就要承擔責任。另外，開OT、長時間工作等都會成為呢類員工嘅寫照。
吊詭嘅係，呢類型高職能嘅人，往往於公司當中係最被人忽略嘅，因為佢哋勁得滯，又唔使人幫又唔使人理，好多時候猶如隱形，認可和獎勵也常常不符；儘管承擔了複雜且高風險的項目，這些員工獲得的認可可能無法反映他們的努力程度和工作影響，從而導致不滿和被低估的感覺。
而最大鑊嘅當然係形成一個依賴嘅模式，即係話嗰位同事會成為公司一個核心得來又唔係好被重視嘅員工，有啲咩大件事都係佢孭，萬一佢劈炮，對公司所構成嘅影響，可以十分巨大。
Performance Punishment我認為係企業一個隱形殺手，大家要多加留意。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
