我估而家都好少人會話打一份工打一世，你點都有機會會轉職離開公司，又或者咁好彩過唔到試用期被辭退。我唔係要喺大家傷口上面灑鹽，因為近兩三個月，喺公司都因為有唔同嘅原因需要辭退同事，一樣米養百樣人，唔同嘅人唔同嘅反應，都可以俾我哋去參考一下，其實若然真係需要離職，可以有咩態度呢？
第一種人係覺得公司對佢唔住，抌地、摞地、投訴又話要告。之前試過係有位同事，已經工作咗幾個月，可惜表現一直都唔理想，已經同佢傾過幾次，佢當然有佢嘅原因，亦都對佢嘅主管嘅管理方式有微言，搞到關係惡劣。最後公司決定延長佢試用期，並且係延長期間決定終止僱傭合約。當時佢情緒激動，不斷諉過上司甚至人事部沒有幫她「保住份工」，拒絕離開公司，更加走到去大老細度投訴。現實歸現實，佢嘅表現一早已經全部記錄，所以到最後都還是需要黯然離開。
第二種就係接受現實型，呢啲你話佢深明大義又得，有自知之明都得。見工嘅時候始終都只係交流過幾次，最後予以聘用其實都係講個信字。可惜當真係埋牙做嘢嘅時候，過得幾個月就開始見真章，未能處理就當然也無可奈何。通常呢類人都會明白自己不適合喺該職位繼續工作，傾好條件之後便執嘢走人，起碼好嚟好去。
第三種就有點歇斯底里，同第一種有啲相似，唔同嘅係唔係以情緒勒索，而係對你嘅決定予以敵視，甚至作出不專業行為。遇過嘅case就係同佢講完過唔到試用期，便二話不說起身走去位度執嘢，經理同人事嚇了一跳，因為連寫好嗰封信都未俾佢就已經起身走人，都幾冇禮貌。後來人事追出去，按程序雙手將信件遞俾佢，他竟然當住人事面將解僱信撕成一半，走到樓下reception嘅時候更加將解僱信搓成一團拋往reception的桌子上。呢啲咁不專業嘅行為，當然會被列入黑名單，永不錄用。
第四種，亦都係最麻煩嗰種，就係同你對簿公堂型。呢啲人有可能一開始看似深明大義，執嘢走人，冇幾耐就整封律師信過嚟，同你追舊債。呢啲人好多時候個目的都只有兩樣：一係為啖氣覺得唔公平；第二就係為咗拗着數。大部份嘅僱主都係守法嘅，好少會炒咗你賠唔足，若然發現真係爭咗，基礎上都會盡快補錢，畢竟喺澳洲勞工法例嚴謹，大部份嘅僱主都唔願意以身試法，搞到自己一身蟻。因此最後搞到要上法庭，好多時間都係頭先講嗰個原因。
上面都係我工作多年以來所見到嘅一啲現況，並冇加上任何judgement,，畢竟每個人喺任何決定背後都有自己嘅原因。同時間，喺現今嘅世代，都冇乜幾多個成世人只係打一份工，新生代每幾年就會轉一次工，而工作上夾唔嚟又或者不幸地未能夠有好嘅表現，而導致需要離職也偶會發生。重要嘅係，點樣喺呢件事上保持正確嘅態度及心態，正所謂「山水有相逢」，自己嘅reputation亦都非常重要，所以就算要結束僱傭關係，維持正面嘅態度，就十分重要。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
