英國皇家檢控署對中國間諜案兩嫌疑撤控，在野黨固然大力抨擊政府，質疑政府干預檢控署獨立，值得留意嘅係公務員對一班政治人物嘅反撲。
事件發酵至今，多個退休公務員連日受訪，兩個前內閣秘書長（Cabinet Secretary）Mark Sedwill 同 Simon Case 話「唔理解政府做法」同「困惑」，前檢控署長 Ken Macdonald 要求政府到國會交代，「驚訝」官員私下向傳媒放檢控署暗箭。現任檢控署長 Stephen Parkinson 更係將矛頭對準政府，話政府唔肯作供導致證據不足。
內閣秘書長 Cabinet Secretary 係最高級嘅公務員，即係香港推問責制前嘅政務司司長，內閣秘書長退休後按慣例就直入上議院。退休公務員出嚟講嘢已經罕見，現任公務員出嚟隊政府，咁就更加顯得事有蹊蹺。咁大隻死貓送埋嚟，冇理由逆來順受嘅。
英國公務員秉持政治中立，但正正係呢個原則使公務員可以喺關鍵時刻更有份量咁左右政局。
疫情lockdown期間 Boris Johnson 喺首相府大排筵席，除咗警察罰款以外，政府逼於壓力而內部調查有冇公職人員行為失當（字面意思，唔係罪行個misfeasance）。調查由高級公務員 Sue Gray 負責，Gray 喺報告抨擊當時政府「決策失當、領導失敗」，又指當時嘅party難以令公眾接受。報告觸發保守黨內對 Johnson 嘅不信任動議投票。
事隔數月，保守黨副黨鞭 Chris Pincher被控性侵同事，Boris Johnson 被揭發任命前已經知情，本身仲矢口否認。最後，外交部前常任秘書長 Simon McDonald主動出信講明Johnson 一早知情，直接導致Johnson 下台。衞報當時就形容McDonald作為前公務員，此舉係 extraordinary 同 devastating。
接任嘅卓慧思 Liz Truss 對公務員系統毫無好感，一上任就炒咗財政部常任秘書長 Tom Scholar ，Sir Tom 在任財政部十年有多，同金融業界打好晒關係。卓慧思一上嚟就炒咗Sir Tom，市場對政府失去信心，最後成份預算案連埋保守黨政府一齊車毀人亡。
諷刺嘅係，首相 Keir Starmer 本人就係公務員出身，從政前官拜檢控署長，邊估到佢前老細Ken Macdonald開到聲要求政府交代 、下手 Stephen Parkinson 會係出嚟指正政府拒絕上庭作證嗰個呢？
英國公務員同其他民主政體比較，可以講係權傾朝野，制度優劣今次就按下不表，小弟返去煲返幾集 Yes Minister 先。
話說回來，呢度有冇人對陳方安生同董建華之間嘅角力有印象？
關於作者：作者現職英國國會研究員，文章內容不代表所屬機構立場。
