相信冇一間公司希望自己嘅商業秘密會俾其他人，尤其是競爭對手，咁梗係啦，冇理由俾人搶生意咁戇居㗎嘛。所以，有唔少嘅公司喺佢哋嘅合同裏邊，都有「限制協議」（Restraint）呢個規矩。老實講句，通常十個有八個簽合同嘅時候會好快睇完就算數，冇咩太過理會。各位求職者要留意，呢個協議裏便可能有一啲嘅條款係會令到你喺離職嘅時候限制你去做某啲嘅事情。
「限制協議」一般嚟講，就係話當你離開公司嘅時候，有可能會被禁止去做出某些嘅事情，例如將你手上嘅客戶轉到新公司啦、又或者將公司未來發展方向、財務狀況等等提供俾你嘅新公司。行政方法可以係禁止你一段時間唔可以搵工，我哋會叫呢個做Garden leave，即係人工照出，不過你唔使返工。呢個方式好多時候會喺銀行或者係理財公司發生，尤其是去到一啲比較高級嘅位置，因為所涉及嘅工資當然越高啦，另外越係高層亦都越了解公司嘅發展方向或擁有一啲比較敏感嘅客戶資料，需要時間去消化同整理，所以先至會出現Garden leave。
另外嘅方法就係如果你辭職嘅話，你會被禁止喺一段時間之內重新投入行業，即係話你嘅新公司需要等一段時間你先可以返工。呢個同頭先講嘅Garden leave有啲唔同，前者係有錢收嘅，後者就冇喇。咁戇居都有人制？記唔記得我頭先講睇合同嘅時候冇望清楚呢？你啲就叫做魔鬼在細節，你唔睇清楚合同，就有機會落入呢啲情況當中。
當然，呢種嘅限制條款責任在受聘嗰一方，好多時候係Integrity問題，因為會否執行呢個條款，到最後其實係個人行為，要為自己行為負責。違反協議其實基礎上就係賭上自己reputation，究竟你個人名譽緊要吖，定係做到單deal緊要呢？呢個係冇答案嘅，完全係個人選擇。咁你可能問，我唔honour呢條條款又點樣呢？由於你係簽咗合同，前僱主當然有權告你啦，同時間未必真係告得入，因為需要有證據顯示你係故意將客戶資料或者公司嘅未來發展同你嘅新僱主分享，唔係真係咁容易可以查到，除非你做到出面，好似一啲知名人士，比較容易了解嘅係明星，例如佢係可樂嘅代言人，咁你限制條款當然係喺公眾場合唔飲百事啦，呢個就係一個比較容易了解嘅限制條款了。
老實講，企業喺「限制協議」呢個框架裏便其實係被動嘅，因為真係非常之依靠員工佢自己嘅個人誠信，頗難控制。對於員工嚟講，就係一個人性嘅挑戰。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
