「說了再見，約定再見，終於再見！」RubberBand前年以《Ciao》一曲，為遠行到新天地的香港人送行，約定未來再見。今年，RubberBand兌現承諾，以《Ciao》之名舉行世界巡迴演出，並以英國作為首站於3月底在歐洲展開，跟散落各地的樂迷「在一起」。
成軍16年，RubberBand將於3月底舉行首次大型巡迴音樂會，選在英國作為首站，在倫敦OVO Arena Wembley及曼徹斯特AO Arena Manchester演出，兩個會場均可容納逾萬人；其後會轉到德國柏林及荷蘭阿姆斯特丹，而德荷兩場演出門票全企位，務求與樂迷超近距離接觸。倫敦站及曼徹斯特站門票將於英國時間2月17日上午10時，分別在axs.com和ticketmaster.co.uk網站公開發售。
主音6號坦言得知要舉行巡唱時，需要好一段時間消化，他說：「今次有一種好大嘅期待，嚟睇我哋嘅觀眾，應該好多都係喺呢段時間離開咗我哋呢個城市嘅香港人，呢種團聚一諗起係好感動，將《RubberBand Ciao 2021》圓滿埋佢。」不過將大型音樂會移師到海外絕非易事，6號直言體能是一大挑戰，他說：「我哋成個團隊坐飛機去到咁遠嘅地方，好多嘢都要靠自己，就係呢啲既興奮又有啲緊張嘅。」他表示會調理好身體，充足休息，亦會向相熟中醫拿舒緩喉嚨及聲帶的中藥以備不時之需。
成軍後舉行首次世界大型巡唱，RubberBand有莫大感觸：「我哋始終係一隊樂隊，心入面有好多殿堂嘅樂隊，佢哋都會行巡演嘅路，我哋組成樂隊以來、出道以來，終於achieve到呢件事。」又指當想到可以跟大家見面已經好感動。不過6號事先向朋友道歉，因屆時未必有足夠時間與他們聚首：「見面又要傾偈又要通宵，我作為主音，可能都會避免去得太多，但都會見吓朋友嘅，只係避開唔太密集咁見，以免影響聲帶。」
除了歐洲4站演出外，RubberBand已計劃將巡唱帶到更多地方，詳情稍後公佈。而為紀錄這個成軍16年來的大事，6號最希望攝影團隊能為他們好好記錄：「呢個紀錄係深情嘅紀錄，真係見我哋穿洲過省，穿越唔同國家，嚟到英國、德國、荷蘭去做呢個演出。我覺得將整個巡演過程拍成一個紀錄片，係一件好正好正嘅事。」他表示此行拍成的片段，將來公映也好，在網上播放也好，總之不想浪費一個成就實踐的紀念。完成歐洲巡演後，6號計劃到波羅的海三國或波蘭旅行鬆一鬆。
《棱角 The Points》編輯部
