新正頭， Sydney HR日與夜喺度祝大家農曆新年快樂，祝大家今年喺職場上工作順利，能夠賺取你應得的份。趁住過年，寫多一篇《農曆新年特別篇》，同大家分享一下喺外地職場，華人如何渡過。
大家有冇啲好奇，想知道喺雪梨嘅職場，新春會係點樣過㗎呢？咁當然啦，呢度始終唔係亞洲地區，係唔會有假放嘅（除非係星期六、日）。好似喺香港中國台灣等地，會幾日嘅連續假期，而澳洲最大型嘅連續假期係喺12月聖誕嘅時候，農曆新年當然唔會有。
除咗商家佬會乘機用農曆新年做藉口減價，由於全澳洲嘅華人人口已經超越150萬，政府於過農曆新年都會有啲慶祝活動，例如會有攤位、一啲小型嘅所謂「年宵市場」等等。咁喺公司呢？其實都有唔少華人嘅企業，佢哋好多都會秉承返農曆新年傳統，例如會派利是、又或者同同事食返餐團年／開年飯。我都曾經喺唔同嘅華人企業打工，雖然過年都仲係返工日，大家一見到面都會講返一啲祝賀嘅說話，各個部門嘅主管亦都會向下屬派利是（咁當然一早已經預咗budget啦）。
我亦都曾經做過一間公司，老闆會要我幫佢寫農曆新年賀詞，於年三十晚發俾公司同事們，中英對照。喺澳洲，人事部就要頂埋呢啲嘢㗎喇，你知啦，中文博大精深，有陣時啲中文嘅四字賀詞，翻譯起上嚟，真係唔係人咁品，所以好多時候都係意譯，未必能夠百分百準確嘅將中文嘅意思翻譯過嚟。
多元文化嘅澳洲，就算你唔係一啲華資公司工作，過年嘅時候，有啲同事都會喺自己個位貼上揮春、或者互相派下利是咁。
而我估對澳洲職場最大影響嘅，莫過於亞洲地區農曆新年時候嘅「Shut Down」，因為個個放假返鄉下，搵又搵唔到，又冇得問吓啲貨去咗邊，都會有啲閉翳。不過有咁講，經歷咗咁多年，好多企業都學精咗， 11、12月嘅時候已經訂定年初第一季嘅貨，減低影響。
咁喺其他嘅國家，大家都可以喺下面留言分享一下，喺職場唔同嘅過年習慣。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
