臨近聖誕，好多公司都會同同事食餐飯慶祝，去迎接Festival season。有啲公司選擇同同事食餐晏仔，亦都有公司係選擇食晚飯，豪一豪佢。你咪以為平呀，聖誕節book一間Club House食餐晏仔，閒閒哋都收$7、80蚊個，講緊嘅都可能只係食啲普通嘅牛扒雞扒咁樣，一個唔覺意你想食好少少，每個人頭就分分鐘過百，若果晚餐嘅話分分鐘雙計添。
呢啲嘢你可能話，喂，Admin做㗎喎，關你人事鬼事咩！係𠺢，訂枱呀安排呀等等就當然唔關我事啦，去到場成個秩序同埋同事嘅behaviour，就與人事有關；一個唔覺意有酒飲嘅話呢，重大鑊。雖然係慶祝聖誕節，由於係公司搞嘅，你成班友都依然係代表緊公司，一間有乜冬瓜豆腐，公司係要負責嘅。另外你如果飲到啤啤夫喺度亂噏廿四，陣間公司請埋啲客一齊慶祝嘅話，就咩形象都冇晒啦。
你可能覺得好誇張，會唔會啊？我話俾你知，一樣米養百樣人，尤其是係做廠嗰啲，喺廠裏邊嘅員工一聽到聖誕有飯食，有大食大，就當然同你死過。曾經試過有同行話俾我知，一聽到夜晚食飯有酒飲，成班友即刻發晒癲，係咁飲，飲醉不特止，仲打交最後叫埋白車，你都咪話唔誇張。當然亦都有啲同行好醒，試過另外一個話，有咩辦法令到佢哋唔好飲咁多呢？好簡單，就係每人只派兩張酒券，然後入場嘅時候喺枱面先放滿清水、汽水同埋果汁，等你班友飲到肚都脹，然後八點左右先至每台放一支紅酒一支白酒，另外再開埋水吧，班友飲極有限，到最後半個醉酒佬都冇。
除咗在場嘅「監控」之外，響飯局前一日更加需要send email俾所有主管，提醒佢哋要「管控」好佢哋自己啲𡃁，千祈唔好俾佢哋飲醉，否則就捉佢返去照肺。主管們一般都好醒目，都唔想自己條Team核核突突
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
