上次同大家分享左現時澳洲職場就業情況嘅一啲update，都收到一啲朋友嘅反饋同埋意見，有啲認為究竟十三萬幾嘅人工係咪真係咁難達到？而喺現時嘅就業環境之下，究竟僱員同埋僱主喺招聘呢一個嘅範疇上面，現況係點樣嘅呢？
首先同大家分享一下，而家請人時候通常遇到嘅問題。之前已經同大家分享過，澳洲而家係進入一個叫做「獵頭」嘅時代，即係話唔係因為嗰個人冇嘢做要搵嘢做，而係佢而家已經有一份工作，想「跳槽」又或者比獵頭公司睇中，介紹一份待遇更好嘅工作俾佢。 你聽到上邊咁講，相信都應該明白，意思即係嗰個人而家並不急住轉換工作，佢係有一份穩定嘅工作，只係外邊有更好路數，佢可以考慮轉工而已。這一群人如果被獵頭公司搵得嘅話，好有可能係會被介紹多份嘅工作，即係話有得揀。咁嘅話佢哋喺見工嘅時候就會非常集中去睇佢嘅升遷呀、工資、團隊文化等等，要啱佢口味啱佢要求佢先至會考慮轉職。
另外有一種就係因為現時嘅生活環境改變，需要增加收入，所以要搵過一份更高人工嘅工作去維持生活。呢班人當然唔會只係投一份履歷，喺現時好多公司都缺乏人才嘅情況之下，呢份履歷好可能就會得到唔同嘅面試機會。咁有咩問題呢？雖然好多公司嘅通知期都係大約兩至四星期，因為呢啲人佢投出嘅簡歷超過一份，亦都可能見咗幾份＇工，就算佢接受咗你嘅Offer，喺Notice period期間，有另一份人工更高嘅工作，佢就會二話不說地投向新嗰份工作，之前應承咗嗰份，一係就作個藉口拒絕，試過有啲睬你都傻人影都冇隻。呢啲人你只可以話佢不負責任，做僱主嘅，又奈佢唔何，最多只可以Blacklist咗佢永不錄用。
講到人工，香港人可能好多身邊嘅朋友都閒閒哋十零萬人工一年，就會覺得好閒啫，應該大部份人都係咁。記住，你入返去國家統計局睇返個數字，我已經講過好多次，其實澳洲嘅人工中位數只係得五萬幾蚊，你可以去到六位數字已經好唔錯。作為人事專業，我可以話俾你知好多員工都係徘徊喺最低工資多少少，即係話每年嘅人工唔會超過$60,000。當然你自己認識嘅群體係中產上層嘅話，當然容易比到嘅一個「好似個個都賺到好多錢」嘅感覺，實際上喺整個雪梨或者大墨爾本，仍然每日只係賺緊非常基礎嘅人工大有人在。
以現時整個營商環境同埋基礎上係會再升多幾次嘅按揭利率，預期喺呢半年失業率有機會上升至4%左右，雖然通脹有所回落（現時大概為5.8% ），然而財政年度剛開始，電費已經加咗起碼30%，生活成本明顯不斷增加。澳洲統計局顯示，有56%嘅員工喺自己現時工作嘅機構年資係低於五年，反映轉工情況嚴重，公司裏邊有資歷嘅員工減少，長遠影響公司發展。
員工唔肯留喺公司另謀高就，原因當然有好多啦，係而家幾大環境，好大機會係因為人工唔夠啦。上面嘅資訊都係我近期招聘所遇到嘅經驗，叫做俾個參考大家。
作者：Sydney HR 的日與夜
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
