上次同大家分享咗有關職場歧視嘅問題，今次同大家講一個都係喺澳洲職場經常會被人談論嘅一種投訴方式，佢就係職場欺凌（Workplace bullying）。一講欺凌，第一可能就第一時間諗到，好似喺小學時候嗰啲「大蝦細」嘅情況。事實上又係咪咁呢？
根據Fairwork，「一個人或一群人反復對另一人或人群做出不合理的行為」或是「該行為對健康和安全造成風險」，便能構成職場欺凌。若然再將其細分，我哋可以咁樣去理解：
- 對他人表現出攻擊性
- 戲弄或惡作劇
- 強迫某人做出不當行為
- 將某人排除在與工作相關的事件之外
- 不合理的工作要求。
呢五點睇落去都有啲空泛，容許我將佢伸延少少。你可以咁樣理解，若然有人對你作出具有攻擊性或恐嚇性嘅行為，使用辱罵性或冒犯性的語言，對你作出嘲笑或羞辱等等，已經構成職場欺凌。除咗呢啲可以定性為「人身攻擊」嘅事情之外，將員工排除在與工作相關的事件之外（例如全公司都有份去食飯係你冇）、給某人太多或太少的工作（可能僱主想逼員工自動離職）、給員工作高於或低於他們的技能水平，或不向員工提供他們完成工作所需的信息等，也能夠構成職場欺凌。
如果不幸遇上事件要點做呢？首先你必須要向部門主管作出投訴，然後轉介人事部處理。假設欺凌你嘅係你主管，你就需要向其上級或者可以直接嘅聯絡人事部，盡量嘗試調解，雙方能夠就事件達成共識，甚至作出道歉。
若然其中一方最後決定訴諸法律，咁佢就需要盡快聯絡Fairwork，作出投訴。否則時間拖得長嘅話，理據變越弱，因為拖咁耐，可能係表示你根本唔當一回事，Fairwork會質疑你投訴嘅動機。一般來講，喺職場欺凌嘅案件，最後都會係調解或者要求公司作出道歉，並為員工作「防止職場欺凌」培訓，賠償好多時候都未必會包含其中。
若果真係考慮索償嘅話，好多時候係會循焦慮、抑鬱或創傷後壓力症候群等方向作出 WorkCover 索償，另外，在某些情況下，你可以提出一次性索償。一種稱為損害賠償金，另一種稱為普通法損害賠償金。
你可以到下面網址參考有關職場欺凌嘅資訊，希望大家唔需要用：
https://www.fwc.gov.au/issues-we-help/bullying
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
